काठमाडौं : एएफसी एसिएन कप छनोटअन्तर्गत भदौ २० गते ताजकिस्तानविरुद्धको खेलका लागि नेपाली टोलीको घोषणा भएको छ । प्रशिक्षक ग्योतुकी कोजीले शनिबार २३ सदस्यीय खेलाडीको नाम सार्वजनिक गरेका हुन् ।
नेपालले घरेलु मैदानमा खेल्न लागेको यो दोस्रो छनोट खेल हो । समूहमा नेपालले एक अवे र एक होम खेल खेलिसकेको छ, जसमा नेपालले एक हार र एक बराबरीको नजिता निकालेको थियो ।
गत चैतमा नेपाल फिलिपिन्ससँग ४–१ ले पराजित भएको थियो । जेठमा घरेलु मैदानमा नेपाल यमनसँग गोलरहित बराबरीमा रोकिएको थियो । नेपाल सम्मिलित समूहको शीर्ष स्थानमा रहेको फिलिपिन्सको ६ अंक छ । दोस्रो स्थानमा रहेको यमनको चार अंक छ । तेस्रो स्थानमा आसीन नेपालको एक अंक छ। ताजकिस्तानले खाता खोल्न सकेको छैन ।
ताजकिस्तानविरुद्धको खेलमा यसअघि टोलीको कप्तानी गरिरहेका अनिल गुरुङलाई बाहिर राखिएको छ । राष्ट्रिय टोलीबाट ५० खेल खेल्दै बिदाइ लिने अभियानमा रहेका अनिलको योजना तत्कालका लागि टरेको छ । टोलीमा अधिकांश खेलाडी भने पुरानै छन् । छोटो समयमा प्रभाव पारेका त्रिभुवन आर्मी क्लबका स्ट्राइकर जर्ज प्रिन्स कार्कीलाई पहिलोपटक राष्ट्रिय टोलीमा मौका दिइएको छ । हालै जापानमा तयारीका लागि गएको टोलीबाट अनिलसँगै गोलरक्षक एलेन न्यौपाने, मिडफिल्डर राजेन्द्र रावल र रक्षक मानबहादुर तामाङलाई आराम दिइएको छ ।
प्रशिक्षक कोजीले घोषणा गरेको टोलीको गोलरक्षकमा विकेश कुथु, विशाल श्रेष्ठ र किरण चेम्जोङ, रक्षकमा विराज महर्जन, जितेन्द्र कार्की, कमल श्रेष्ठ, दिनेश राजवंशी, अनन्त तामाङ, देवेन्द्र तामाङ र आदित्य चौधरी, मिडफिल्डरमा हेमन गुरुङ, हेमन्त थापामगर, विक्रम लामा, विशाल राई, सुजल श्रेष्ठ, सुनिल बल, रोहित चन्द, अञ्जन विष्ट र सुमन लामा रहेका छन् । स्ट्राइकरमा नवयुग श्रेष्ठ, भरत खवास, विमल घर्तीमगर र जर्ज प्रिन्स कार्की छन् । टोलीको प्रशिक्षकमा राजुकाजी शाक्य र गोलरक्षक प्रशिक्षकमा उज्ज्वल मानन्धर रहेका छन् ।
ताजकिस्तानसँगको खेल सातदोबाटोस्थित एन्फा कम्प्लेक्सको एस्ट्रो टर्फमा हुनेछ ।
प्रतिक्रिया दिनुहोस !
