लन्डन : साविक विजेता जर्मनी र पूर्वविजेता इङ्ल्यान्ड अर्को वर्ष रुसमा हुने विश्वकप फुटबलको छनोट नजिक पुगेका छन् । शुक्रबार भएको आआफ्नो खेलमा जित हात पार्दै जर्मनी र इङ्ल्यान्डले रुस विश्वकपको यात्रा लगभक पक्का बनाएका हुन् ।
जर्मनीले चेक रिपब्लिकलाई २-१ गोलले पराजित गर्दा इङ्ल्यान्डले माल्टाविरुद्ध ४-० को भारी अन्तरको जित निकाल्यो । चेक रिपब्लिकको मैदानमा भएको खेलमा माट्स हुमेल्सको निर्णायक गोलमा विश्व च्याम्पियन जर्मनीले महत्वपूर्ण जित हात पार्यो । छनोट खेलमा लगातार सातांै जित हात पारेको जोएचिम लोयको टोलीले समूह सीको शीर्ष स्थानमा स्पष्ट पाँच अंकको अग्रतासमेत बनाएको छ । छनोट चरणको अन्तिम तीन चरणको खेल बाँकी रहँदा जर्मनीको सम्भावना निकै बलियो देखिएको छ ।
खेल बराबरीतर्फ अघि बढिरहेको अवस्थामा हुमेल्सले खेलको ८८औं मिनेटमा गोल गर्दै जर्मनीलाई महत्वपूर्ण जित दिलाएका थिए । यसै साता होटलको बाल्कुनीबाट पौडी पोखरीमा हामफालेको भिडियो सामाजिक सञ्जालमा पोस्ट भएपछि हुमेल्सले टोली व्यवस्थापनको गाली खाएका थिए । लगत्तै महत्वपूर्ण खेलमा गोल गर्दै उनले टोलीका लागि आफ्नो महत्व प्रस्ट्याएका छन् । हुमेल्सले टोनी क्रुजको फ्रिकिकमा हेडिङ गोल गरेका थिए ।
त्यसअघिको खेलमा १-० को अग्रता बनाएर पनि जर्मनी बराबरी गोल बेहोर्न पुगेको थियो । जर्मनीलाई खेलको चौथो मिनेटमै टिमो वेर्नरले १-० ले अघि बढाएका थिए । खेलको ७८औं मिनेटमा भ्लादिमिर दारिदाले सशक्त प्रहारमा चेक रिपब्लिकलाई १-१ गोलको बराबरीमा ल्याएका थिए ।
यता ह्यारी केनले लिगमा आफ्नो गोलको खडेरीलाई मेटाउँदै दुई गोल गरेपछि इङ्ल्यान्डले पनि माल्टालाई उसकै मैदानमा पराजित गर्यो । प्रिमियर लिगमा टोट्टनहामको सुरुआती तीनमध्ये तीनै खेलमा गोल गर्न असफल भएका केनले टोलीलाई ५३औं मिनेटमा १-० ले अघि बढाएका थिए । त्यसपछि खेलको ८५औं मिनेटमा र्यान बट्र्रान्डले इङ्ल्यान्डका लागि अर्को गोल थपेका थिए ।
खेलको इन्जुरी समयमा डानी वेलब्लेक र केनले लगातार गोल गरेपछि इङ्ल्यान्ड छनोट चरणमा पाँचौं जित हात पार्न सफल भयो । दुई खेलमा बराबरी गरेको इङ्ल्यान्ड छनोट चरणअन्तर्गत समूह एफमा दोस्रो स्थानको स्लोभाकियाभन्दा दुई अंकले माथि छ ।
विश्वकपको युरोपेली छनोटअन्तर्गत शुक्रबार भएको अर्को खेलमा विश्व वरीयताको पाँचौं स्थानमा रहेको पोल्यान्डले भने डेनमार्कसँग ४-० को भारी अन्तरको पराजय बेहोरेको छ । पराजयसँगै समूह ईको शीर्ष स्थानमा पोल्यान्डको अग्रता पनि तीन अंकमा झरेको छ ।
प्रतिक्रिया दिनुहोस !
