नदीजन्य पदार्थको चोरी रोक्न विशेष टोली

परासी : जिल्लाका विभिन्न खोलाहरूबाट नदीजन्य पर्दाथको चोरी बढेपछि प्रहरीले विशेष टोली परिचालन गरेर नियन्त्रण अभियान सञ्चालन गरेको छ । अभियान सञ्चालनपश्चात् २० दिनको अवधिमा १३ लाख रुपैयाँभन्दा बढी राजश्व संकलन भएको छ ।

असारमा खोलाहरूको ठेक्का अवधि सकिएलगत्तै ढुंगा र बालुवाको चोरी निकासी तीव्र रूपमा बढे पनि प्रहरीले वास्ता नगरेको गुनासो बढेको थियो । सोही समयमा सरुवा भएर आएका प्रहरी उपरीक्षक मुकुन्दराज आचार्यले विशेष टोली गठन गरेर नियन्त्रण अभियान सञ्चालन गरेपछि दैनिकजसो चोरीका सवारीसाधन नियन्त्रणमा आउन थालेका हुन् । अहिले दिनहुँजसो ढुंगा, बालुवा चोरी गरेको भन्दै प्रहरीले सवारीसाधन जिल्ला समन्वय समितिमा ल्याउने गरेको निमित्त स्थानीय विकास अधिकारी वसन्त भट्टराईले बताए । साउन २५ देखि हालसम्म १३ लाख २८ हजार जरिवानाबापतको राजश्व संकलन भएको उनले जानकारी दिए ।

 

प्रहरीको सक्रियतासँगै चोरीका सवारीसाधन पक्राउ पर्ने क्रम बढेको र दैनिकजसो १ लाखका दरले जरिवाना संकलन हुने गरेको भट्टराईले बताए । खोलामै गएर नदीजन्य पर्दाथ संकलन गरेको अवस्थामा पक्राउ परेका सवारीसाधनमा सबैभन्दा बढी ट्र्याक्टर छन् । ८४ वटा सवारीसाधनबाट जरिवाना संकलन गरिएको हो जसमा ८० वटा ट्र्याक्टर, ३ वटा टिपर र १ जेसीभी छन् ।

जिल्ला समन्वय समितिले चोरी गर्ने सवारीसाधनमध्ये ट्र्याक्टरलाई १५ हजार, टिपरलाई २५ हजार र जेसीभीलाई ५० हजार जरिवाना तोकेको छ । सबैभन्दा बढी दुम्किवास, सुनवल, कावासोती, अरुणखोला, भूमही, बर्दघाटलगायतका क्षेत्रबाट नदीजन्य पदार्थको चोरी हुने गरेको प्रहरी उपरीक्षक आचार्यले बताए । ठेक्का नलाएको अवस्थामा खोलाहरूमा चोरी बढेको र ठेक्का नलागेसम्म प्रहरीको विशेष अभियान सञ्चालन हुने प्रहरी उपरीक्षक आचार्यले बताए ।

प्रहरी निस्क्रिय हुँदा राजश्वसमेत घाटा हुने देखिएको भन्दै निमित्त स्थानीय विकास अधिकारी भट्टराईले नदीजन्य पर्दाथको अभावमा निर्माण कार्यमा क्रमशः समस्या पर्न थालेकाले खोलाको ठेक्का प्रक्रिया सुरु गरिने बताए ।

जिल्लाका १३ वटा खोलामा ठेक्का लगाउन राष्ट्रपति चुरे संरक्षण समितिमा सहमतिका लागि पत्रचार गरिएको उनले बताए । सहमति आउनेबित्तिकै प्रक्रिया अघि बढाएर ठेक्का आह्वान गरेपछि चोरी निकासी नियन्त्रणमा आउने उनले बताए । नदीजन्य पदार्थको ठेक्का लगाउँदा जिल्ला समन्वय समितिले वार्षिक १४ करोडभन्दा बढी राजश्व संकलन गर्दै आएको छ ।