अनधिकृत रुपमा नदिजन्य पदार्थको तस्करी

धरान: धरान उपमहानगरपालिकाको पूर्वतर्फको सेउतीखोलामा अनधिकृत रुपमा स्काभेटर प्रयोग गरी नदिजन्य पदार्थ ढुङ्गा, गिटी र बालुवा तस्करीले तीब्रता पाएको छ। इनरुवाका ठेकेदार जयप्रकाश साहले स्काभेटर र ट्रिपर प्रयोग गरी नदीजन्य पदार्थको उत्खनन गरिरहेका छन्।

सरकारले मानववस्ती, पुल, मोटरबाटो, वन क्षेत्र र सार्बजनिक स्थलको ५ सय मिटर वरपर खोला उत्खनन गर्न प्रतिबन्ध लगाएको भएपनि धरानको सेउती खोलामा भने निर्वाध रुपमा ढुंगा, गिटी र बालुवाको तस्करी हुँदा पनि प्रशासन मौन रहेको भन्दै स्थानीय आक्रोशित बनेका छन्। उनीहरुले नदिजन्य पदार्थ उत्खनन् रोक्न र ठेकेदारलाई कारवाही गर्न माग पनि गरेका छन्।

जिल्ला प्रहरी कार्यालय सुनसरीका प्रहरी उपरीक्षक विद्यानन्द माझीले सेउती खोलामा अनधिकृत रुपमा स्काभेटर प्रयोग गरी नदिजन्य पदार्थको तस्करी गर्ने को १ ख १७६७ नम्बरको स्काभेटर, को १ ख ५६४७ नम्बरको ट्रिपर सहित चालकहरु महेश यादव र कुमार कार्कीलाई पक्राउ गरी कानुनी कारवाही अगाडि बढाइएको बताए।

धरानको सेउती खोला र शेहरा खोलामा स्काभेटरले नदिजन्य पदार्थको उत्खनन गरिएका कारण यस पटक बुढिखोला, शेहरा खोला र सेउती खोलाको बाढी आउँदा इटहरीका विभिन्न बस्तीमा बसेर ८ जनाको ज्यान लिनुका साथै सयौं घर डुबानमा परेका थिए।