एउटै विद्यालयमा दुई प्रधानाध्यापक

जाजरकोट : जिल्लाको एक विद्यालयमा दुईजनाले प्रधानाध्यापक भएर काम गरिरहेको पाइएको छ । छेडागाड नगरपालिका ११ झाप्रास्थित बाल माध्यमिक विद्यालयमा व्यवस्थापन समितिले एकजनालाई र जिल्ला शिक्षा कार्यालयले अर्कोलाई प्रधानाध्यापकको जिम्मेवारी दिने निर्णय गरेपछि विद्यालयमा दुईजना प्रधानाध्यापक भएका हुन् ।

राजनीतिक खिचातानीका कारण एउटै विद्यालयमा दुई व्यक्ति प्रधानाध्यापक भएका हुन् । तत्कालीन प्रधानाध्यापक प्रतिमा थपलियाको गत वर्ष जिल्लाबाहिर सरुवा भएपछि माध्यामिक तह राहत दरबन्दीमा कार्यरत शिक्षक विनोदकुमार शाहलाई निमित्त प्रधानाध्यापकको जिम्मेवारी दिइएको थियो । शिक्षा कार्यालयले साउन २२ गते विद्यालय व्यवस्थापन समितिलाई शिक्षा नियमाबलीअनुसार स्थायी शिक्षकमध्येबाट एकजनाको नाम प्रधानाध्यापक नियुक्तिका लागि सिफारिस गर्नु भनेर परिपत्र पठायो ।

समितिले कार्यालयको पत्रको बेवास्ता गर्दै उच्च मावि अनुदान कोटामा कार्यरत शिक्षक पृथीबहादुर सिंहलाई साउन २६ गते प्रधानाध्यापक पदमा नियुक्ति गर्ने निर्णय गरेपछि विवाद चुलिएको हो । व्यवस्थापन समितिले गरेको निर्णय नियमसंगत नभएको भन्दै शिक्षा कार्यालयले निमित्त प्रधानाध्यापकको जिम्मेवारी सम्हाल्दै आएका शाहलाई नै निरन्तरता दिएको छ । तर व्यवस्थापन समितिले सिंहलाई नै प्रधानाध्यापकको जिम्मेवारी दिने अडान लिएपछि दुवैले प्रधानाध्यापक आफू नै भएको दाबी गर्न थालेका छन् । त्यस विद्यालयमा माध्यमिक तहमा कुनै पनि शिक्षक स्थायी छैनन् । शिक्षा ऐनअनुसार माध्यमिक तहको प्रधानाध्यापकमा सम्बन्धित तहको स्थायी नभएको खण्डमा सोही तहको अस्थायी, सो पनि नभए तल्लो तहको स्थायी शिक्षक हुनुपर्ने व्यवस्था गरेको छ ।

विद्यालयमा प्रधानाध्यापक र अन्य विषयमा विवाद भइरहँदा गत चार वर्षदेखि चार कोठे भवन निर्माण अलपत्र परेको र शिक्षकको आपसी मनमुटाबले पठनपाठन प्रभावित भएको छ ।

साबिकको निमावि तहमा तीनजना स्थायी शिक्षक बद्रीनाथ योगी, भक्तबहादुर खत्री र कुलानन्द चौधरी रहेकाले कार्यालयले ती तीनजनामध्ये एकलाई प्रधानाध्यापक नियुक्त गर्न गरेको पत्राचारलाई विद्यालय व्यवस्थापन समितिले लत्याइदिएको छ । विद्यालय व्यवस्थापन समितिका अध्यक्ष भक्तबहादुर थापाले विद्यालयको हित र सबैको सल्लाहमा पृथीवहादुर सिंहलाई प्रधानाध्यापक पदमा नियुक्त गरिएको दाबी गरे । उनले शिक्षा कार्यालयले किन आफूहरूको निर्णय मानेन भन्ने थाहा नभएको बताए ।

विद्यालयमा प्रधानाध्यापक र अन्य विषयमा विवाद भइरहँदा गत चार वर्षदेखि चार कोठे भवन निर्माण अलपत्र परेको र शिक्षकको आपसी मनमुटाबले पठनपाठन प्रभावित भएको कक्षा १० का लोकेन्द्र भारतीले बताए । उनले विद्यालय भवन नहुँदा धेरै विद्यार्थी एउटै कोठामा भेडाबाख्राजस्तो गरेर बस्नु परेको बताए । कक्षा १० मा एक सय १३ जना विद्यार्थी एउटै कोठामा बस्न बाध्य भएको उनले बताए । उनले शिक्षक सिंहले आफूलाई प्रअ स्वीकार गर्न कक्षा कोठामै गएर दबाब दिने गरेको बताए ।

आफ्नो विरोधमा उत्रिएका ६ जना विद्यार्थीलाई शिक्षक सिंहले कुटपिटसमेत गरेको भारतीले बताए । भवन निर्माणको जिम्मा शिक्षक सिंहले चार वर्षअघि लिएका थिए । शिक्षकको विवाद र भवन अभावले आफूहरूको पढाइमा ठूलो बाधा पुगे पनि सरोकारवाला मौन रहेको कक्षा ८ का ललित सिंहले गुनासो गरे । भारती र सिंहले आफूलाई शिक्षक सिंहले प्रअ स्वीकार गर्न दबाब दिँदै मानसिक तथा शारीरिक यातना दिएको भन्दै जिल्ला बालकल्याण समितिमा उजुरीसमेत दिएको बताए । आफूहरू न्यायका लागि जिल्ला सदरमुकाम आएको उनीहरूको भनाइ छ ।

जिल्ला शिक्षा अधिकारी ललितविक्रम सिंहले विद्यालयको प्रधानाध्यापक नियमावलीअनुसार नबनाएसम्मका लागि निमित्त प्रअ विनोदकुमार शाही नै भएको बताए । उनले विद्यालय व्यवस्थापन समितिको गलत निर्णय र केही अभिभावक तथा शिक्षकको बदमासीका कारण विद्यालयमा समस्या बढ्दै गएको बताए । आफूले राम्रो काम पनि नगर्ने र कार्यालयले दिएको निर्देसन पनि नमान्ने शिक्षकका कारण विद्यार्थीको पढाइमा बाधा पुगेको जिशिअ सिंहले बताए ।