दुर्घटनामा सात घाइते 

विराटनगर: मोरङका अलगअलग स्थानमा भएका सवारी दुर्घटनामा परेर सात जना घाइते भएका छन्। बेलबारी नगरपालिका ८ चिसाङखोला नजिकै सोमबार साँझ दुईवटा मोटरसाइकल एकआपसमा ठोक्किदा चार जना गम्भीर घाइते भएका छन्। 

पूर्वबाट पश्चिमतर्फ आउँदै गरेको को २५ प ५३५४ र विपरीत दिशाबाट आएको ७ प २५५९ नम्बरको मोटरसाइकल ठोक्किदा दुर्घटना भएको हो।

इलाका प्रहरी कार्यालय बेलबारीका प्रहरी निरीक्षक रामजी कटुवालका अनुसार दुर्घटनामा परेर २५५९ नम्बरको मोटरसाइकलका चालक मोरङ कानेपोखरी गाउँपालिका २ का ३० वर्षीय अम्बिका कोईराला, श्रीमती २८ वर्षीय सम्झना कोईराला र दुई वर्षीय छोरा असन कोईराला घाइते भएका छन्।

५३५४ नम्बरको मोटरसाइकलका चालक धनकुटा राजारानी ६ का ४४ वर्षीय रुद्र लिम्बू पनि घाइते भएका छन् । घाइते चारै जनाको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ।

यस्तै मोरङको कटहरी गाउँपालिका ४ स्थित विराटनगर-रंगेली सडक खण्डमा को २१ प ९३३ नम्बरको मोटरसाइकल अनियन्त्रित भएर दुर्घटना हुँदा तीन जना घाइते भएका छन्।

मोटरसाइकल चालक मोरङ जहदा गाउँपालिका ४ का १९ वर्षीय मुन्ना मण्डल, पछाडि सवार १८ वर्षीय अनिल मुखिया घाइते भएका छन् । मोटरसाइकलले ठक्कर दिंदा पदैलयात्री रंगेली नगरपालिका ७ का २० वर्षीय निरज मण्डल समेत घाइते भएको प्रहरीले जनाएको छ । प्रहरीका अनुसार घाइते सबैको कोसी अञ्चल अस्पताल विराटनगरमा उपचार भइरहेको छ ।