काठमाडौं : महिला बालबालिका तथा समाज कल्याण मन्त्रालयले मानव बेचबिखन तथा ओसारपसारविरुद्ध योगदान पु¥याएको भन्दै दुई सञ्चारकर्मीसहित विभिन्न व्यक्ति एवं संघ संस्थालाई सम्मान तथा पुरस्कृत गरेको छ ।
मानव बेचबिखन तथा ओसारपसारविरुद्धको ११ औं राष्ट्रिय दिवसका अवसरमा मन्त्रालयले मंगलबार राजधानीमा कार्यक्रम आयोजना गरी पुरस्कार तथा सम्मान गरेको हो ।
पुरस्कृत हुनेमा हिमालय टाइम्सकी पत्रकार रमा लुइँटेल, तथा कान्तिपुर एफएमकी पार्वता चौधरी छिन् । परस्कृतलाई सभामुख ओन्सरी घर्ती, महिला बालबलिका तथा समाजकल्याण मन्त्री आशा कोइराला र राज्यमन्त्री मोहम्द जाकिर हुसेनले नगदसहित दोसल्ला र कदर पत्र प्रदान गरे ।
यसैगरी महिला विकास अधिकृत सावित्रा न्यौपाने रौटहट, प्रहरी जवान सपना ऐरी (चौधरी) कञ्चनपुर, एचआइभी संक्रमित नातीसरा राई पुरस्कृत भएका छन् ।
गैरसरकारी संस्थातर्फ ललितपुर ठेचोस्थित शान्ति पुनस्र्थापना गृह पुरस्कृत भएको छ । पुरस्कृत हुनेलाई जनही १० हजार प्रदान गरिएको थियो । यसैगरी सम्मानित हुनेमा मकवानपुरमा कार्यरत महिला विकास निरीक्षक दुर्गा घिमिरे, अभियानमा सक्रिय मकवानपुरका आरती पाठक र अस्मिता नेपाल छन् । साथी संस्था ललितपुरलाई पनि मानवबेचबिखन विरुद्धको अभियानमा सक्रिय रहेको भन्दै सम्मान गरिएको थियो ।
कार्यक्रममा सभामुख ओन्सरी घर्तीले पछिल्लो समयमा मानवबेचबिखन फरक फरक स्वरुपमा जालो जस्तै गरि फैलिएको बताउँदै त्यस विरुद्ध उत्रन चेतना महत्वपूर्ण भएको बताइन् ।
सबैभन्दा ठूलो शक्ति चेतना भएको बताउँदै मानसिकतामा परिवर्तन नभएसम्म भएका कानुन र नीति नियम पनि सेतो कागजमा काला अक्षर बाहेक केही नहुने बताइन् । मानवबेचबिखन तथा ओसारपसार जस्ता विसंगतिको अन्त्यका लागि राजनीतिक स्थीरता आवश्यक रहेको बताइन् ।
महिला, बालबालिका तथा समाजकल्याण मन्त्री आशा कोइरालाले मानवबेचबिखन र ओसारपसार बाह्यसँगसँगै देशभित्रै पनि रहेको औल्याइन् ।
आर्थिक, सामाजिक कारणले मानवबेचबिखन र ओसारपसार बढ्दै गएको बताउँदैै उनले सरकारको एक्लो प्रयासले मात्रै यसको अन्त्य नहुने प्रष्ट पारिन् । राज्यमन्त्री मोहम्द जाकिर हुसेनले विकासशील देशहरुमा गरीबी , अशिक्षाका कारण बेचबिखन र ओसारपसारको समस्या बढ्दै गएको बताए ।
मन्त्रालयका सचिव खगराज बरालले बेचबिखनविरुद्ध अभियान र सचेतनाका कार्यक्रम संचालन गदागर्दै पनि यो समस्या न्यून नभएकोमा दुःख व्यक्त गरे ।
उनले राष्ट्रिय तथा अन्तराष्ट्रिय प्रतिवेदन हेर्दा यसको स्वरुप र दायरा समेत बढ्दै गएको स्पष्ट पारे । उनले नेपालको कुटनीतिक नियोग नभएको देश र श्रम स्विकृति नलिएका मुलुकमा समेत बेचबिखनको सिकार भएर नेपाल पुगेकोमा चिन्ता व्यक्त गरे। उनले बेचबिखनमा संलग्नलाई कानुनको दायरामा ल्याउनुपर्ने बताउँदै अभियानलाई सशक्त बनाउनुपर्ने बताए ।
कार्यक्रममा माइती नेपाल र शक्ति समुहले तयार पारेको नाटक देखाइएको थियो ।
त्यसैगरी प्रभावित महिलाको भोगाई समेटिएको पुस्तक कथा र यात्रा पत्रिकाको विमोचन गरिएको थियो ।
प्रतिक्रिया दिनुहोस !
