भाइरल ज्वरोले सिंगो गाउँवासी नै ग्रस्त
भोजपुर : विश्वराज र अस्मिता राई दम्पतीले भाइरल ज्वरोका कारण साढे २ वर्षकी काखे छोरी आयुषालाई गुमाउनुपर्यो । भाइरल ज्वरोको शिकार बनेकी आयुषाको धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा ज्यान गएको हो । विश्वराज दुई वर्षअघि वैदेशिक रोजगारीमा गएका थिए । घरमा दाजु-भाउजू, श्रीमती अस्मिता र छोरीलाई छाडेर उनी विदेश गएका हुन् ।
सोही गाउँका ठाकुरसिंह राईले पनि श्रीमती ४५ वर्षीया विष्णुकुमारीलाई भाइरल ज्वरोकै कारण गुमाउनुपर्यो । राईले विष्णुकुमारीको स्वास्थ्य अवस्था जटिल हुँदै गएपछि प्राथमिक स्वास्थ्य चौकी प्याउली लगेका थिए । तर, त्यहाँ उपचार हुन नसकेपछि स्वास्थ्यकर्मीले धरान लैजान सल्लाह दिए । धरान पुर्याएर उपचार सुरु गरेको आधा घन्टामै विष्णुकुमारीको निधन भयो । धरानमै श्रीमतीको दाहसंस्कार गरी ठाकुरसिंह आँसु पुछ्दै घर फर्किए ।
महामारीको रूप लिएको भाइरल ज्वरोले अरुण गाउँपालिका वडा नम्बर २, चम्पेको सोरेङवासी ग्रसित भएका छन् । डेढ सय परिवार रहेको उक्त गाउँमा भाइरलका कारण दुईजनाको मृत्यु भएको हो । अहिले पनि धेरै बिरामी परेका छन् । उपचारका लागि कतिपयलाई प्याउली त कतिलाई धरान, विराटनगर लगिएको छ । धेरैजसो बिरामी भने घरमै प्राथमिक उपचार गराइरहेका छन् । ५०-६० जना बिरामीको उपचार भइरहेको हो ।
सहनै नसक्ने गरी ज्वरो आउने, छटपटी हुने, कडा निमोनिया हुनेजस्ता लक्षण देखापरेर पूरै गाउँले सिकिस्त बनेको स्थानीय सन्तोष राईले जानकारी दिए । ‘यो रोगले सुरुमा ठाकुरसिंहकी श्रीमतीलाई समातेको थियो । त्यसपछि एक्कासि गाउँका सबै घरका मानिसलाई ज्वरो आउने, छटपटी, कडा निमोनिया हुने लक्षण देखिन थालेपछि हामी त्रसित बन्यौं ।’
सबैलाई पालै पालो स्वास्थ्य चौकी लगेको उनले सुनाए । ‘प्याउलीबाट रिफर गरिएका दुईजना उपचारका क्रममा बिते’, उनले भने, ‘बाँकी बिरामीको उपचारपछि स्वास्थ्यमा क्रमिक सुधार भइरहेको छ ।’
प्राथमिक स्वास्थ्य चौकीमा दुई दिनअघिसम्म भाइरलका बिरामीको चाप बढेको थियो । प्राथमिक उपचारपछि धेरै बिरामी घर फर्केका छन् । अझै ११ जना उपचाररत रहेको र उनीहरूको अवस्था सुधारोन्मुख रहेको अहेव रूपक पुलामीले जानकारी दिए ।
‘सुरुमा बिरामीको संख्या धेरै थियो, अहिले उपचारपछि धेरैजसो घर फर्किसकेका छन्’, अहेव पुलामीले भने, ‘बिरामीमध्ये बच्चाहरूमा निमोनियाको लक्षण देखिएको थियो ।’ उचित औषधि नहुँदा पाँच÷६ जनालाई धरान पठाएको जानकारी दिँदै उनले भने, ‘तीमध्ये एक बालिका र एक महिलाको निधन भएको छ । अरू ११ जनाको उपचार सन्तोषजनक नै छ ।’
प्रतिक्रिया दिनुहोस !
