स्याहार केन्द्रमा रमाउँदै बाढीपीडित बालबालिका

बर्दिया : बबई नदीको बाढीबाट प्रभावित क्षेत्रका बालबालिका शिशु स्याहार केन्द्रमा रमाउन थालेका छन् । महिला तथा बालबालिका कार्यालयसँगको समन्वयमा एसओएसले निःशुल्क दिवा शिशु स्याहार केन्द्र सञ्चालन गरेसँगै बालबालिकाले रमाइलो गर्ने थलो पाएका हुन् । बाढीपछि सडकछेउका जोखिमयुक्त शिविरमा बस्दै आएका बालबालिकालाई एसओएसले स्याहार केन्द्र सञ्चालन गरेको हो । 

 

गुलरिया नगरपालिकाको इन्द्रपुर र मुक्तिनारायण टोलका शिविरमा बस्दै आएका बालबालिकालाई स्याहार केन्द्रमा राखेको एसओएस बर्दियाका संयोजक शिव चौधरीले जानकारी दिए । 'घर पूर्ण क्षति भएका इन्द्रपुरका ७० र मुक्तिनारायण टोलका २४ परिवारका ८४ बालबालिकामध्ये ४० जनालाई स्याहार केन्द्रमा राखेका हौं ।'

उनले ६० जना क्षमताको केन्द्रमा दुईदेखि पाँच वर्षमुनिका बालबालिकालाई राखेको जानकारी दिए । त्यस क्षेत्रका बालबालिका जोखिममा परेका कारण स्याहार केन्द्र सञ्चालन गर्नुपरेको उनको भनाइ छ । केन्द्रले एक महिनासम्म रेखदेख गर्नेछ ।

बालबालिकाको रेखदेखसँगै उनीहरूको क्षमता विकासका लागि विभिन्न क्रियाकलाप गराइरहेको केन्द्रकी इन्चार्ज शान्ता थापाले बताइन् । 'हामीले बिहान ७ बजे बालबालिकालाई केन्द्रमा स्वागत गर्छौं', उनले भनिन्, 'बेलुकी ५ बजेसम्ममा बिदाइ हुन्छ । केन्द्रमार्फत बिहान खाजा खुवाएपछि शैक्षिक कार्यक्रम, खेलकुद, सरसफाइलगायत विभिन्न क्रियाकलाप गराउँछौं ।'

उनले बालबालिकालाई मापदण्डअनुसारको पौष्टिक आहारसँगै सादा खाना खुवाउने गरेको सुनाइन् । यसका साथै क्षमता विकासका क्रियाकलाप सिकाउने गरेको उनले प्रस्ट्याइन् ।बाढीबाट गुलरिया, बाह्रबर्दिया, मधुवन, राजापुर, ठाकुरबाबा, बाँसगढी नगरपालिका र गेरुवा तथा बढैयाताल गाउँपालिका प्रभावित भएका छन् । बर्दियामा ६ हजार एक सय १८ घर पूर्ण, १४ हजार सात सय ९७ घर आंशिक क्षति भएको जिल्ला दैवी प्रकोप उद्धार समितिले जनाएको छ ।