घरेलु मैदानमै जिल्लियो नेपाल

काठमाडौं : स्ट्राइकिङ लाइन फितलो बन्दा नेपाली टोली एसिया कप छनोट फुटबलको घरेलु मैदानमै खेलिएको खेलमा ताजकिस्तानसँग २-१ गोलले पराजित भएको छ । ताजकिस्तानसँगको पराजयसँगै नेपालको एसिया कप छनोट यात्रा पनि कठिन बन्दै गएको छ । सातदोबाटोस्थित एन्फा कम्प्लेक्स मैदानमा मंगलबार नेपाल पहिलो हाफमै २-० गोलले पछि परेको थियो ।

खेलको सुरुदेखि नै नेपालविरुद्ध आक्रामक देखिएको ताजकिस्तानले २५औं मिनेटमा खाता खोलेको थियो । ताजकिस्तानका लागि जालिलोभ मनुचेहरले पहिलो गोल गरे । उनले उमारवोभ पारभिजाजोनको कर्नर पासमा गोल गरेका थिए । ३०औं मिनेटमा भासिभ दिलसाहोदले गोललाइन नजिकबाट अर्को गोल थपेका थिए । उनले नेपालका गोलरक्षक किरनकुमार लिम्बूको नजिकबाटै गोल गर्दै टोलीको अग्रता दोब्बर बनाएका थिए ।

पहिलो हाफमा दबाब झेलेको नेपालले दोस्रो हाफमा भने सुधारिएको खेल खेलेको थियो । नेपालका लागि विमल घर्तीमगरले ६१औं मिनेटमा गोल फर्काए । । ३९औं मिनेटमा नवयुग श्रेष्ठको स्थानमा मैदान छिरेका विमलले अञ्जन विष्टको पासमा ताजकिस्तानका गोलरक्षकलाई बिट गर्दै खाली पोस्टमा गोल गरेका थिए । पहिलो हाफमा नेपालले एउटा अवसर खेर फालेको थियो । २०औं मिनेटमा अञ्जन विष्टको पासमा सुजल श्रेष्ठको फितलो प्रहार बाहिरिएको थियो ।

ताजकिस्तानले दोस्रो हाफमा रक्षात्मक रणनीति अपनाएको थियो । ६३औं मिनेटमा नेपालले विशाल राईको स्थानमा प्रिन्स जर्ज कार्कीलाई मौका दिएको थियो । त्रिभुवन आर्मी क्लबबाट खेल्दै आएका प्रिन्सले राष्ट्रिय टोलीबाट डेब्यु गरेका हुन् । डुब्यु खेलमै दुईवटा फितलो अवसर पाएका प्रिन्सको गोल गर्ने प्रयास भने सफल भएन । त्यसअघि ५३औं मिनेटमा विमलको करिब ३० यार्ड लामो फ्रिकिक प्रहार बाहिर हुइँकिएको थियो । ५९औं मिनेटमा विमलको अर्को प्रहारलाई ताजकिस्तानका गोलरक्षकले पन्च गर्दै विफल पारेका थिए । ८०औं मिनेटमा कमल श्रेष्ठको लामो प्रहारलाई ताजकिस्तानका गोलरक्षकले बचाएपछि नेपाल हार खेप्न बाध्य बन्यो ।

खेलपछि नेपालका प्रशिक्षक ग्योतुकी कोजीले नेपालको तुलनामा ताजकिस्तानले निकै राम्रो खेलेको बताए । 'पहिलो हाफमा हामीले स्वाभाविक खेल खेल्न सकेनौं । टोलीका लागि आशा गरिएका स्ट्राइकरद्वय नवयुग श्रेष्ठ र भरत खवास जम्न सकेनन् । दोस्रो हाफमा विमल, प्रिन्स र विक्रम लामालाई पठाएपछि खेल केही राम्रो भयो । विमलले राम्रो खेले । हामीले गोल फर्काएपछि थप अवसर पनि पाएका थियौं । सुरुमा प्रिन्सलाई पठाउनु चुनौती नै थियो । प्रिन्स अर्को खेलमा लागि तयार भएको छ', कोजीले भने ।

कोजीले एएफसी छनोट खेल्ने मौका नेपालका लागि 'सरप्राइज' भएको पनि बताए । 'हामीले सोलिडारिटी कप जितेकाले मौका पाएका हौं । यो खेलबाट नेपालले धेरै कुरा सिक्ने अवसर पाएको छ । छनोटको विषयमा अझै केही भन्न सकिन्न । सुधारका लागि नयाँ खेलाडी जन्माउनुपर्छ । हामीले हारलाई दबाब होइन चुनौतीको रूपमा लिएका छौं', कोजीले भने ।

यसैगरी ताजकिस्तानका प्रशिक्षक फुजायलोभ खाकिमले टोलीको तीन अंक हात पार्ने योजना सफल भएको बताए । 'पहिलो हाफमा हामीले धेरै राम्रो खेल्यौं । दुई गोलको अग्रता बनाएपछि त्यसलाई जोगाउने चुनौती थियो । त्यसले गर्दा प्रेसर पनि खेप्यौं । दोस्रो हाफमा नेपालले धेरै राम्रो खेल्यो तर हामीले पनि राम्रो मौका पाएका थियौं । यस जितले नेपालसँगको अर्को खेलका लागि थप ऊर्जा मिलेको छ । समूहमा फिलिपिन्स केही बलियो देखिएको छ । आगामी खेल जित्दै छनोट हुनेमा आशावादी छौं', उनले भने ।

कठिन बन्दै नेपालको यात्रा

ताजकिस्तानसँगको हारले नेपालको एसिया कप छनोट यात्रा कठिन बन्दै गएको छ । समूह 'एफ'मा रहेको नेपालको यो तेस्रो खेल हो । नेपालले समूहगत चरणको पहिलो खेल फिलिपिन्ससँग उसैको मैदानमा गत चैत २५ गते खेलेको थियो । उक्त खेलमा नेपाल फिलिपिन्ससँग ४-१ गोलले पराजित भएको थियो । गत जेठमा घरेलु मैदानमा खेलिएको खेलमा भने नेपाली टोली यमनसँग गोलरहित बराबरीमा रोकिएको थियो ।

नेपालले अब अर्को खेल फिलिपिन्ससँग आगामी नोभेम्बर १४ मा घरेलु मैदानमा खेल्नेछ । समूहको शीर्ष स्थानमा रहेको फिलिपिन्सको ६ अंक छ । दोस्रो स्थानमा रहेको यमनको चार अंक छ । यसअघि अंकविहीन अवस्थामा रहेको ताजकिस्तानले मंगलबार नेपाललाई हराएपछि तीन अंक जोड्दै आफूलाई तेस्रो स्थानमा पुर्‍याएको छ । एक अंकमा सीमित नेपाल तालिकाको अन्तिममा छ । समूहमा समावेश प्रत्येक टोलीसँग 'होम एन्ड अवे' प्रणालीमा खेलिने छनोट प्रतियोगिताका शीर्ष दुई टोली सीधै एसिया कपका लागि छनोट हुने प्रावधान छ ।