दुर्घटनामा एकको मृत्यु, दुई घाइते

विराटनगर: पूर्व पश्चिम राजमार्ग अन्तर्गत मोरङको बेलबारी नगरपालिका २ मा बुधबार राति मारुती भ्यान र मोटरसाइकल आपसमा ठोक्किंदा एक जनाको मृत्यु भएको छ। दुई जना गम्भीर घाइते भएका छन्।

पूर्वबाट पश्चिमतर्फ आउँदै गरेको मे १ च १२६३ नम्बरको मारुती भ्यान र पश्चिमबाट पूर्वतर्फ जाँदै गरेको को ९ प ८८१३ नम्बरको मोटरसाइकल राति ११:१५ बजे आपसमा ठोक्किएको थियो। दुर्घटनामा मोटरसाइकल चालक बेलबारी ३ का २५ वर्षीय संजोग लिम्बूको घटनास्थलमै मृत्यु भएको इलाका प्रहरी कार्यालय बेलबारीका प्रहरी निरीक्षक रामजी कटुवालले बताए।

उनका अनुसार दुर्घटनामा मोटरसाइकलको पछाडि सवार बेलबारी ३ का २१ वर्षीय रन्जित घले र भ्यानमा सवार महोत्तरी जलेश्वर घर भएका सुनसरी तरहरा कृषि अनुसन्धान केन्द्रका प्रमुख ५९ वर्षीय सुरेन्द्र प्रसाद घाइते भएका छन्।

घलेको धरान स्थित बीपी कोइराला स्वास्थ्य विज्ञान प्रतिष्ठान र सुरेन्द्रको न्यूरो अस्पताल विराटनगरमा उपचार भइरहेको छ। भ्यानका चालक झापा कन्काई नगरपालिका ४ का ताराबहादुर कोइरालालाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ।