हतकडीसहित अयिभुक्त फरार

बुटवल : कपिलवस्तु प्रहरीको नियन्त्रणमा रहेका एकव्यक्ति चितवनबाट हत्कडी सहित भागेका छन् ।  मानव बेचविखन आरोपमा कृष्णनगर प्रहरीले नियन्त्रणमा लिएका मंगला गाउंपालिकाका ३ म्याग्दीका सन्देश किसान सोमबार राति हत्कडी सहित भागेको बताइएको छ ।

 

प्रहरी श्रोतका अनुसार २१ वर्र्षीय किसानलाई बानेश्वर प्रहरीको आग्रहमा सोमबार कृष्णनगर प्रहरीले काठमाडौं लैजादै थियो ।  प्रहरी हवल्दार हरिबहादुर बिष्टको साथमा काठमाण्डौ लगिदै गरेका किसान हत्कडीसंगै फरार भएपछि प्रहरीमा मिलोमतोको आशंका व्यापक उत्पन्न भएको छ । फरार भएका किसानको हातमा रहेको हत्कडी ईच्छा कामना गाऊंपालिका वडा नं ६ मुग्लिङ नजिकै सडक छेउंमा भेटिएको चितवन प्रहरीले बताएको छ ।

घटनामा प्रहरीको लापरवाही भएकाले गुपचुपमै भित्रभित्रै मिलाएर सामसुम पार्न खोजिएको बुझिएको छ । जिल्ला प्रहरी कार्यालय चितवनका अनुसार घटनाको अनुसन्धान कपिलवस्तु प्रहरीले गरिरहेको छ ।

प्रहरीको साथ लागेर पठाइएका व्यक्ती हत्कडीसंगै भागेको केही समयमै सडक किनारमा हत्कडी भेटीनुलाई रहस्यपुर्ण रुपमा हेरिएको छ । जिल्ला प्रहरी कार्यालय कपिलवस्तुका प्रहरी प्रवक्ता प्रहरी नायब उपरीक्षक प्रल्हाद अधिकारीले काठमाडौं लैंजादै गर्दा अभियुक्त फरार भएको र उसको खोजी भइरहेको बताए ।