कतारसँगको समस्या समाधान गर्न राष्ट्रपति ट्रम्पले साउदी नरेशलाई बोलाए अमेरिका

वासिङ्टन :साउदीसहित चार मुलुकले कतार माथि नाकावन्दी लगाएपछि उत्पन्न तनाव समाधान गर्न अमेरिकी राष्ट्रपति डोनाल्ड ट्रम्पले साउदी नरेश सल्मानलाई आगामी जनवरीमा अमेरिका बोलाएका छन् । संयुक्त राज्य अमेरिका हाल कतारसँगको कूटनीतिक संकट समाधानका लागि मार्ग खोजिरहेको छ । कतारको उसका छिमेकी मध्यपूर्वी देशसँग पछिल्लो समयमा सम्बन्ध बिग्रिएको छ । त्यसको समाधान गर्न अमेरिकाले चासो देखाएको हो । यस विषयमा दुई नेता वीचको भेटमा वार्ता हुने जनाइएको छ ।

साउदी अरेबियाका नरेश सल्मान आगामी बर्ष सन् २०१८ को सुरुमै अमेरिकाको औपचारिक भ्रमणमा आउन लागेको अमेरिकी राष्ट्रपतिको कार्यालय ह्वाइट हाउसले बिहीबार जानकारी दिएको हो । साउदी नरेश अमेरिकी राष्ट्रपति डोनाल्ड ट्रम्पसँग वार्ताका लागि अमेरिका भ्रमणमा जान लागेका हुन ।

राष्ट्रपति ट्रम्प र साउदी नरेश सल्मानबीच फोनमा वार्ता भएको थियो । त्यस वार्ताका क्रमम आगामी सो भेटमा द्विपक्षीय हितको प्रवर्धनका लागि के कसरी रणनीति बनाएर अघि बढ्ने भन्ने बारेमा कुराकानी भएको थियो ।
ट्रम्प र सल्मान वीच मध्यपूर्वमा सुरक्षा र सम्बृद्धिको बारेमा के कसरी द्विपक्षीय रुपमा लाभान्वित हुने भन्ने बारेमा कुराकानी भएको ह्वाइट हाउसद्वरा जारी गरिएको विज्ञप्तिमा जनाइएको छ ।

सो विज्ञप्तिमा उल्लेख गरिएको छ– ‘दुवै नेताहरु यस विषयमा सहमत भएका छन कि साउदी नरेश सल्मान आगामी सन् २०१८ को सुरुवातमा अमेरिका भ्रमणमा आउनेछन ।’रासस/एएफपी