तीन महिनापछि खुल्यो डोल्पाको जुफाल विमानस्थल

सुर्खेत : तीन महिनापछि डोल्पाको जुफाल विमानस्थल खुलेको छ । धावनमार्ग कालोपत्रे गर्न असारबाट बन्द भएको विमनस्थला निर्माणको काम सम्पन्न भएपछि शुक्रबारबाट सुचारु भएको हो ।

शुक्रबारको परीक्षण उडान सफल भएसँगै अब नियमित उडानका लागि जुफाल विमानस्थल खुलेको हो । विमानस्थल बन्द हुँदा आन्तरिक नाकाबन्दी भोग्न बाध्य डोल्पाली शुक्रबारबाट खुसी छन् । सडक संजालले नछोएको डोल्पामा हवाई यातायात एकमात्र विकल्पका रुपमा रहेको छ ।

 

तीन महिनापछि शुक्रबार बिहान नेपालगंजबाट तारा एयरको जहाज जुफाल विमानस्थलमा अवतरण गरेको हो । पाँच सय ६० मिटर लामो विमानस्थलको धावनमार्ग कालोपत्रे गरिएको छ । कालिका सिद्धी कन्सट्रक्सन जेवीले धावनमार्गमा कालोपत्रे गरेको हो । इन्जिनियर वीरप्रसाद शाहीले धावनमार्गमा कालोपत्रेको काम सम्पन्न भएपछि विमानस्थल खुला गरिएको बताए ।

शुक्रबार तारा एयरका वरिष्ठ क्याप्टेन प्रभाकर घिमिरे, क्याप्टेन बसन्त लामा र नागरिक उड्यन प्राधिकरण नेपालगञ्जका प्रमुख प्रतावबाबु तिवारीसहित पाँच जनाको टोलीले जुफाल विमानस्थलमा सफल अवतरण गरेका हुन्।

विमानस्थल खुलेसँगै हवाई भाडादर पनि घटाइएको छ । तीन महिनापछि जहाज चढेर जिल्ला बाहिर र जिल्लाभित्र आवतजावत गर्ने अवसर पाएपछि डोल्पाका बासिन्दा खुसी भएका छन् । उनीहरुले शुक्रबार विमानस्थलमै पुगेर परीक्षण उडान गर्ने चालक र कर्मचारीलाई फूलमाला तथा अविरले सम्मान गरे । स्थानीय बालकृष्ण डाँगी भने, ‘अब कसैले उपचार नपाएर मर्नुपर्ने छैन, जहाजमै बिरामीलाई बाहिर लाने पाइने भयो।

विमानस्थल बन्द भएको समयमा स्थानीयले महँगोमा हेलिकोप्टर चार्टर गरेर जिल्ला बाहिर जानुपर्ने बाध्यता थियो ।

नागरिक उड्यन प्राधिकरण नेपालगंजका प्रमुख प्रतावबाबु तिवारीले विभिन्न समस्या झेल्दै धावनमार्ग कालोपत्रे गर्ने काम सम्पन्न भएको बताए । उनले अब विमानस्थलमा जहाज अवतरण गर्न सक्ने भएकाले डोल्पालीलाई सहज हुने उल्लेख गरे । धावनमार्गका कारण अब जहाज कम्पनीले पनि पहिलाको जस्तो सास्ती भोग्नु नपर्ने उनको भनाइ छ ।

डोल्पालीको समस्यालाई मध्यनजर गर्दै हवाई सेवा सुचारु गरिएको प्राधिकरणले जनाएको छ । यद्यपी धावनमार्गको ५५ मिटर र पार्किङ्गको केही भाग भने कालोपत्रे हुन बाँकी भएको प्राविधिक वीरप्रसाद शाहीले जानकारी दिए । उनका अनुसार अबको २० दिनमा विमानस्थलको बाँकी सबै काम सम्पन्न हुनेछ ।