ललितपुर : सांसद ओमदेवी मल्लले सहकारी ऐन आएपश्चात सहकारी व्यवसायिक बन्ने बताएकी छिन् । सहकारी ऐनको अन्तिम तयारी भएको भन्दै सांसम मल्लले ऐनपछि सहकारी बचतमा मात्र केन्द्रीत नभई उत्पादन र व्यवसायमा केन्द्रीत हुने बताइन् ।
थेचो महिला जागरण बचत तथा ऋण सहकारी संस्थाको नवौं वार्षिक साधारणसभाको अवसरमा बोल्दै सांसद मल्लले तीन वर्ष लगाएर तयार पारेको नयाँ सहकारी ऐन छिट्टै आउने तयारीमा रहेको र त्यसले सहकारी अभियानको ८० प्रतिशतभन्दा बढी भावना समेट्न सकेको बताइन् । नयाँ ऐनमा १५ प्रतिशत सेयर लाभांशलाई बढाएर १८ प्रतिशत पुर्याइएको उनको भनाई थियो । त्यस्तै २० प्रतिशत करलाई झारेर नगरमा पाँच प्रतिशत, उपमहानगरमा ७ प्रतिशत र महानगरमा १० प्रतिशत कर लाग्ने व्यवस्था ऐनमा समावेश गरिएको मल्लले जानकारी दिइन् ।
त्यस्तै सेयर पुँजीको १० गुणाभन्दा बढी बचत राख्न नपाइने गरिएको प्रस्तावलाई बढाएर १५ गुणासम्म पुर्याइएको उनले बताइन्। ‘संभवतः असोज ४ गते हुने संसदमा ऐन संसदको कार्यसूचीमा राखिनेछ' उनले भनिन् ।
मल्ले दिगो विकास लक्ष्य प्राप्ति सहकारीबाटै सम्भव भएको बताइन् । संयुक्त राष्ट्र संघले अघि सारेका सन् २०१६ देखि २०३० सम्मका १७ वटा दिगो विकासका लक्ष्य सहकारीबाटै सम्भव भएको बताइन् । गरिबी निवारण, रोजगारी सिर्जना गर्न सहकारी अपरिहार्य भएको उनको भनाई थियो ।
‘सहकारी बचत तथा ऋणको कारोबार मात्र होइन, व्यवसायिक बन्न सके मात्र दिगो विकास लक्ष्य प्राप्त गर्न सकिन्छ' उनले भनिन् । अर्थतन्त्रका तीन खम्बामध्ये सहकारी मूल खम्बा बन्न उत्पादनमा जानुपर्ने आवश्यकता भएको भन्दै उत्पादनतर्फ केन्द्रीत हुन उनले जोड दिइन् ।
राष्ट्रिय सहकारी संघको उपाध्यक्षसमेत रहेकी मल्लले सहकारीमा महिला सहभागिता बढ्दै जानु खुसीको कुरा भएको भन्दै महिला नेतृत्वतहमा आउन जरुरी रहेको बताइन् । ‘सहकारीले महिलालाई आत्मबल प्रदान गर्नुका साथै आर्थिक सशक्तीकरणमा भूमिका खेलेको छ' उनले भनिन् । सहकारी क्षेत्रमा महिला सहभागिता ५१ प्रतिशत पुगेको र सहकारीले सञ्चालन गरेका सहकारी पनि सफल भएको उनको भनाई थियो । ‘नेतृत्वतहमा महिला सहकारीकर्मी पुग्न जरुरी छ, अब महिलाले आरक्षण, सहभागिता भन्दा पनि नेतृत्व लिन ध्यान दिनुपर्छ' उनले जोड दिइन् ।
कार्यक्रममा बोल्दै थेचो महिला जागरण बचत तथा ऋण सहकारी संस्थाकी कार्यवाहक अध्यक्ष लक्ष्मीतारा डंगोलले संस्थाको शेयर पुँजी ७५ लाख पुगेको जानकारी दिनुभयो । संस्थाले गत वर्ष १८ लाख ६५ हजार २ सय ३ रुपैयाँ कूल नाफा तथा १२ लाख ७५ हजार ९सय ६ रुपैयाँ खुद मुनाफा गरेको छ । संस्थाले ५ करोड ११ लाख ११ लाख ३४ हजार ९ सय ९१ बचत संकलन गरी ५ करोड ३ लाख ३९ हजार ऋण लगानी लगानी गरेको छ । संस्थाका सेयर सदस्य २०५८ जना पुगेका छन् । कार्यक्रमा विभिन्न विधामा उत्कृष्ट हुनेहरुलाई सम्मान गरिएको थियो ।
प्रतिक्रिया दिनुहोस !
