लेखनाथ : मुक्तककार गौरी तमु (गुरुङ)ले मातृभाषा नेपाली भाषामा लेखेको पहिलो मुक्तक संग्रह ‘समैं दर्बानी’ अर्थात ‘समयको दर्पण’ सार्वजनिक भएको छ। शनिबार संगीत नाट्य प्रज्ञा प्रतिष्ठानका कुलपति सरुभक्त, मुक्तककारका बुबा टेकबहादुर र आमा छलिमाया गुरुङले पुस्तक सार्वजनिक गरेका हुन्। संग्रहमा रहेका एक सय ३५ नेपाली मुक्तकको गुरुङ भाषामा भावानुवाद भने केहरसिंह गुरुङले गरेका छन्।
कृति लोकार्पण समारोहमा बोल्दै सरुभक्तले बहुभाषिक र बहुसांस्कृतिक मुलुकमा साहित्यमार्फत गौरीको प्रयासले ऐतिहासिक महत्व राख्ने बताए। ‘तुलनात्मक रुपमा नेपाली साहित्यमा गुरुङको उपस्थिति न्युन भएको समयमा यो कृति इतिहासबद्ध हुनेछ।’
कृतिमाथि टिप्पणी गर्दै मुक्तक मञ्च पोखराका सल्लाहकार रुपिन्द्र प्रभावीले गौरीले मुक्तकमा गरेको प्रयोग अनुकरणीय भएको बताए। ‘जीवनवादी र समाजवादी यथार्थमा आधारित मुक्तक लेखेर आफ्नो विशेष पहिचान जमाउन गौरीले सफलता प्राप्त गर्नेछिन्,’ उनले भने, ‘समैं दर्बानी’ले नेपालको पछिल्लो एक दशकको दर्पण उतारेको छ।’
मुक्तककार गुरुङले अबको लेखन परम्पराभन्दा भिन्न ढङ्गले अघि बढ्नुपर्ने विचारले कृति निकालेको बताइन्। ‘भाषा, साहित्य, कला नै हाम्रो पहिचान हो,’ उनले भनिन्, ‘आफ्नो मातृभाषाका केही शब्द मात्रै भए पनि नयाँ पुस्ताका लागि समर्पण गर्न पाउँदा गौरवबोध भएको छ।’
मुक्तक मञ्च पोखराको आयोजनामा भएको कार्यक्रममा तमु धिं नेपालकी अध्यक्ष कर्म गुरुङ, चितवन साहित्य परिषदका अध्यक्ष सुरेन्द्र अस्तफल, मञ्चकी अध्यक्ष सरला लामिछाने ‘सरु’ लगायतले मुक्तकमा गरिएको नौलो प्रयोगको प्रशंसा गरे।
प्रतिक्रिया दिनुहोस !
