प्रदीपका बडीगार्ड 

 काठमाडौं : पछिल्लो समय नेपाली चलचित्रले राम्रो व्यापार गरिरहेको छ । तर केही दिनयता राम्रा चलचित्र र त्यसको व्यापारभन्दा पनि अभिनेता प्रदीप खड्का र उनका बडीगार्डको चर्चा बढी छ । कतै उनलाई स्याबासी दिँदै त कतै उडाएर सामाजिक सञ्जालका भित्ताहरू रंगिएका छन् । केही दिनअघि चलचित्र ‘लिली बिली'को घोषणा कार्यक्रमपछि यो चर्चा सुरु भएको हो । त्यहाँको दृश्य देख्दा चर्चा गर्न लायककै थियो । तर प्रदीपलाई हाँसोको पात्र बनाउन कति उचित छ भन्ने विषय अहिले चलचित्रकर्मीमाझ बहस चलिरहेको छ ।

 

सम्भवतः यसअघि त्यो स्तर र शैलीमा नेपाली चलचित्रको घोषणा सायदै गरिएको थियो । पाँचतारे होटेलमा चलचित्रकर्मीको बाक्लो उपस्थिति । सानदार रूपमा सजाइएको स्टेज । केही क्षणको पर्खाइपछि दुई युवती पालैपालो दुईदुईजना बडीगार्डसहित मञ्चमा आए । पर्दामा कहिल्यै नदेखिएका उनीहरूको व्यक्तित्व अनि प्रस्तुति देख्दा लाग्थ्यो उनीहरू चर्चित सेलिब्रेटी हुन् । उनीहरू मञ्चमा आसनग्रहण गरिनसक्दै अभिनेता प्रदीप खड्का चारजना बडीगार्डसहित कार्यक्रम हलमा भित्रिए । दर्जनौं क्यामराका फोकसमा उनी चम्किए । ती दृश्य देख्दा लाग्थ्यो त्यहाँ बलिउड वा हलिउड स्टार अभिनीत चलचित्रको घोषणा वा प्रिमियर हुँदैछ । तर त्यो मिलन चाम्स निर्देशित चलचित्र ‘लिली बिली'को घोषणा कार्यक्रम थियो ।

प्रेमगीत, प्रेमगीत २ जस्ता चलचित्र दर्शकमाझ आएपछि अभिनेता प्रदीप खड्काको क्रेज बढ्दो छ । तर उनी चारचारजना बडीगार्ड लिएर कार्यक्रमस्थलमा पुगेको सायद धेरैलाई अनौठो लाग्यो । वास्तवमा अभिनेता खड्का त्यहाँ आफ्ना निजी गार्ड लिएर गएका थिएनन् । निर्माण पक्षले कलाकारलाई दिएको सम्मान थियो । यसबारे भएका नकारात्मक टिप्पणीप्रति निर्देशक मिलन चाम्सको गुनासो छ । ‘नेपाली चलचित्र र कलाकार अब यो स्तरमा पुग्नुपर्छ । त्यहाँसम्म पु¥याउने हामीले नै हो', उनले भने, ‘यदि कुनै विदेशी चलचित्रका लागि यति गरेको भए सबैले वाह भन्थे । नेपाली चलचित्रको स्तर उन्नतिका लागि प्रयास गर्दा उल्टै नकारात्मक टिप्पणी हुन्छ । मैले कुरै बुझिनँ ।'

मिलन चाम्स निर्देशित यो छैटौं चलचित्र हो । उनको निर्देशनमा बनेको चलचित्र ‘हँसिया' र ‘वीरविक्रम' दर्शकमाझ आइसकेको छ भने ‘बब्बी', ‘ब्लाइन्ड रक्स' र ह्याप्पी डेज' प्रदर्शनको तयारीमा छ । ११ महिनामा ठूलो बजेटका चारवटा चलचित्र निर्देशन गरेका चाम्स ‘लिली बिली' छायांकनका लागि सम्पूर्ण युनिटलाई लिएर दसैंपछि बेलायत उड्दै छन् । ‘यो चलचित्रको सम्पूर्ण छायांकन यूके र स्कटल्यान्डमा हुँदैछ', उनले जानकारी दिए ।

चलचित्रमा प्रदीपसँग पहिलो पटक अन्स्क्रिन रोमान्स गर्दैछन् जसिता गुरुङ र रेभिता गुरुङ । जसिता बेलायतमा आयोजित ‘यूके डान्स अफ २०१७' को विजेता हुन् भने रेभिता मोडलिङ हुँदै चलचित्र क्षेत्रमा आएकी हुन् । चाम्स इन्टरटेनमेन्ट, काफिया फिल्मस् र टाइम्स इन्टरटेनमेन्टको संयुक्त ब्यानरमा बन्न लागेको यस चलचित्रमा अनुपविक्रम शाहीको पनि अभिनय रहनेछ । गोविन्द शाही र सुदीप खडकाको लगानी रहने चलचित्र त्रिकोणात्मक प्रेमकथामा आधारित छ । चलचित्र आगामी चैत ३० गते रिलिज गर्ने लक्ष्य राखिएको छ ।