वीरगन्जको मतगणना साढे ११ बजे सुरु हुने
वीरगन्ज : प्रदेश नम्बर २ को एक मात्र महानगर वीरगन्ज महानगरपालिकाको मतगणना मंगलवार बिहान साढे ११ बजे देखि सुरू हुने भएको छ । मंगलवार बिहान बसेको सर्वपक्षीय बैठकले बिहान साढे ११ बजे देखि मतगणना सुरू गर्ने निर्णय गरेको हो ।
ठाकुरराम बहुमुखी क्याम्पसमा बिहान साढे ११ बजे देखि मतगणना सुरू गर्ने निर्णिय भएको बैठकमा सहभागी मुख्य निर्वाचन अधिकृत विष्णु सुबेदीले जानकारी दिए । एकैपटक १० वटा स्थानबाट मतगणना सुरू गर्ने निर्णय भएको जानकारी दिदै उनले मतगणना स्थलमा सिसिटिभी क्यामेरा पनि जडान गरिएको बताए । यसका साथै मतगणना हुने हरेक कोठामा दलका प्रतिनिधहरुलाइ जाली बाहिरै बस्ने गरी व्यवस्था मिलाइएको छ ।
मतगणनास्थलमा एक दलबाट एक जना प्रतिनिधिलाइ मात्रै बस्ने दिने निर्णय बैठकले गरेको छ । सोमबार भएको निर्वाचनमा वीरगन्ज महानगरपालिकाको ३२ वटै वडामा कति मत खसेको छ भन्ने विषयमा मुख्य निर्वाचन अधिकृतको कार्यालयले अहिले सम्म यकिन तथ्यांक उपलब्ध गराएको छैन । सोमबार वीरगन्ज महानगरमा ७३ प्रतिशतको हाराहारीमा मत खसेको भनेर मुख्य निर्वाचन अधिकृत सुबेदीले बताएपनि खसेको मतको यकिन संख्याका बारेमा जानकारी दिएका छैनन् । वीरगन्ज महानगरपालिकामा कुल एक लाख ८ हजार ५ सय १ मतदाता रहेका छन् ।
प्रतिक्रिया दिनुहोस !
