तेक्वान्दोमा नेपालको सम्भावना सकियो

 

अस्गवाद : पाँचौं एसियन इन्डोर तथा मार्सल आर्ट्स गेम्सको तेस्रो दिन मंगलबार नेपाली तेक्वान्दो खेलाडीका लागि सुखद रहेन । नेपालले आशा गरेको तेक्वान्दो खेलमा सहभागी दुवैजना खेलाडीले पराजय भोगेका छन् । अस्गवादस्थित ओलम्पिक भिलेजको तेक्वान्दो डान्स स्पोटर््स एरेनामा भएको महिला ५३ केजी तौलसमूहमा नेपालकी नीमा गुरुङ र पुरुष ६३ केजी तौलसमुहमा बीरबहादुर महरा पहिलो चरणबाटै बाहिरिए ।

 

इरानकी नाहीद कीयानीचानडेहसँग २२-२ ले पराजित भएपछि नीमा अन्तिम १६ बाटै बाहिरिइन् । नीमामाथि नाहीद तीनवटै बाउटमा हावी बनेकी थिइन् । खेलपछि नीमाले नेपालमा सेन्सर प्याडमा अभ्यास गर्न नपाउँदा सोचेजस्तो प्रदर्शन गर्न नसकेको बताइन् । ‘विपक्षी ठिकै थिए तर, म सम्हालिन सकिन । सेन्सर प्याडमा खेलेर आउन पाएको भए नतिजा राम्रो आउँथ्यो । यहाँ आएर अलिकपति मात्र अभ्यास गरेको हो, थोरै अभ्यासले मात्र पुगेन’, २१ वर्षीया नीमाले भनिन् । निमा १२ औं दक्षिण एसियाली खेलकुद (साग) की रजत पदक विजेता हुन् ।

यसैगरी नेपालका बलिया प्रतिस्पर्धीका रुपमा हेरिएका बीरबहादुरले केही राम्रो प्रदर्शन गरे । ताजिकिस्तानका डाव्लाटमुरोड कारिमोभसँग भिडेका बीरबहादुर पहिलो बाउटमा ८-० अंकले पछि परेका थिए । तर दोस्रो बाउटमा उनले खेलमा पुनरागमन गर्दै विपक्षीलाई कडा चुनौती दिए । दोस्रो बाउटमा बीरबहादुरले ६-१ अंकले अगाडी रहँदै समग्रमा ९-६ अंक बनाए । तर तेस्रो तथा अन्तिम बाउटमा ६-६ अंकको बराबरी खेले पनि बीरबहादुर डाव्लाटमुरोडलाई १५-१२ अंकको झिनोअन्तरले नतिजा सुम्पन बाध्य भए । पहिलो बाउटमा कमजोर खेल्दा उनको अघिल्लो चरणको यात्रा रोकिन पुग्यो।

खेलपछि निरास बनेका बीरबहादुरले पनि नेपालमा सेन्सर प्याडमा अध्यास गर्न नपाएकोले राम्रो खेलेर पनि हार्नु परेको बताए । ‘हामीलाई सेन्सर प्याडमा खेल्ने बानी छैन । ठूला प्रतियोगिता खेल्दा सेन्सर प्याडमै खेल्नु पर्छ । मैले सकभर राम्रो खेल्ने प्रयास गरें । कमब्याक पनि गरेको थिए तर, मेरा लागि दुर्भाग्य भयो । पहिलो बाउटमा अंक गुमाउँदा दुःख लागेको छ,’ २२ बर्षीय बीरबहादुरले भने ।

बीरबहादुरले जारी प्रतियोगिताको मार्च पास्टमा नेपालको झण्डा बोकेका थिए । तेक्वान्दो प्रशिक्षक हरिहरप्रसाद पाण्डेले समेत सेन्सर प्याडमा खेलाडी अभ्यस्थ नहुँदा राम्रो खेलेर पनि हार खेप्नु परेको बताए । ‘सेन्सरमा नखेलेका हाम्रा खेलाडीलाई सेन्सरमा किक हान्न गाह्रो भयो । सँधै सेन्सरमा अभ्यास गराउन सके यस्तो अवस्था हुन्न’, प्रशिक्षक पाण्डेले भने ।