गायकको रूपमा जंगम 

काठमाडौं : सबैले उनलाई संगीतकारका रुपमा चिन्छन् । अनि केहीले गीतकार । बुधबार साँझ नेपाल प्रज्ञा प्रतिष्ठानको प्रेक्षालयमा थोरैलाई मात्र थाहा भएको उनको प्रतिभा पोखियो । संगीतकार दीपक जंगम गायकको रूपमा प्रस्तुत भए । त्यसो त उनले थुप्रै गीत रेकर्ड गरेका छन् । तर संगीतकारको रूपमा जुन परिचय स्थापित भयो, गायकको रूपमा त्यो बन्न सकेन । ‘द हिडन ट्रेजर' ले आयोजना गरेको अविरल यात्रा २०७४ मा उनले संगीत भरेका गीतहरू प्रस्तुत भए ।

 कार्यक्रमको सुरुवात उनकै आवाजबाट भयो । गीत थियो, ‘यति धेरै माया दिई' । कसले गाउँछ भन्ने रहस्यले दर्शक श्रोतालाई खुलदुल भइरहेको थियो । केहीले अनुमान गरेका थिए । उनले संगीत भरेका सैयौं गीतहरूको भीडमा सबैको मनमा बसेको एउटा गीत हो यो । स्वरसम्राट् नारायणगोपाल गुरुवाचार्यले गाएको यस गीतलाई दीपकले गाउँदा दर्शक श्रोताले फरक स्वाद चाख्न पाए । जंगमको गायन क्षमता संगीतभन्दा कम रहेनछ ।

कार्यक्रमको दोस्रो प्रस्तुतिस्वरूप सुमनकुमार श्रेष्ठले ‘टोपी लाए पनि हुन्छ' सुनाए । लताकी फ्यान गायिका तारा थापाले ‘हजार चोटी जन्मुला' सुनाइन् । आफ्नै शैलीमा प्रस्तुत भए, गायक आनन्द कार्की । उनलाई चिनाउने गीत ‘यी हल्लाहरू हुन्' गाए । कार्यक्रमको लागि राम्रा गायकगायिका छानिएका थिए । त्यसमध्येको आकर्षण कर्णदास । उनको आफ्नै गीत ‘कसले पो देख्छ र' गाएपछि उनको दोस्रो प्रस्तुतिले माहोल फेरिदियो । यसै पनि गहकिलो संगीतको त्यो माहोललाई अझ गह्रौँ बनाइदियो ।

गुलाम अलीको स्वर रहेको गजल ‘गाजलु ती ठूलाठूला आँखा' गाएर कर्णदासले सबैलाई मन्त्रमुग्ध पारे । गुलाम अलीले गाएर मात्र यो गजल ओझिलो भएको होला भन्ने सोच फेरिदिए उनले । नेपाली शैलीमा ‘ठूल्ठूला आँखा' भनेर गाउँदा गीतमा नौलो मिठास सुनियो । अरुणा लामाको स्वरमा रहेको गीत ‘विरहले रोएको रातमा' लाई बानिका प्रधानले न्याय गरिन् । दीपककै छोरा अजर जंगमले ‘लोलाएका ती ठूला' बोलको गजलमा सास जोडे । शब्दशब्दको भावमा चुर्लुम्म डुबेर उनले मिठास भरे । उनको आफ्नै गीत ‘जिन्दगीले हिसाब माग्छ' कार्यक्रमको सुन्दर प्रस्तुतिहरूमध्येको एक थियो ।

रामकृष्ण ढकालले ‘मीठा मीठा कुरा सबै' र ‘एउटा मान्छेको मायाले कति' गीत सुनाए । संगीता प्रधानले ‘लहरेबर घुमाउने चौतारी', निशा देशारले ‘जीवन र यदि गीत हो भने', शैलेश सिंहले ‘तिम्रो र मेरो बीचको' र ‘तिमीलाई म के भनुँ' सुनाए । कार्यक्रमको आकर्षणको रूपमा रहेका दुई गायक दीप श्रेष्ठ र दीपक खरेल अन्तिम चरणमा प्रस्तुत भए । दीपले ‘तिम्रो यादमा' र ‘दोधार भयो' सुनाए । दीपक खरेलले ‘आँखामा राख्न खोज्छु' र ‘गरुँ की मीठो भूल' सुनाएर कार्यक्रम अन्त्य गरे ।

जंगमले आधा शताब्दी लामो संगीत यात्रामा संगीत भरेका गीतमध्येबाट १९ वटा गीत कार्यक्रममा प्रस्तुत गरिएको थियो । द हिडन ट्रेजरले गत वर्षदेखि अग्रज स्रष्टाको सम्मानमा ‘अविरल यात्रा' कार्यक्रम सुरु गरेको हो । योसँगै मञ्चको कार्यक्रमबापत स्रष्टालाई रोयल्टी दिने कार्यको पनि थालनी गरेको छ ।