मधेस आन्दोलनको उद्गम स्थलमा एमाले विजयी
सिरहा : मधेस आन्दोलनको उद्गमस्थल सिरहाको लहान नगरपालिका नेकपा एमालेले कब्जा गरेको छ । लहानको मेयरमा एमालेका मुनी साह र उपमेयरमा एमालेकै सरियार कुमारी चौधरी फराकिलो मतान्तर विजयी भएका छन् ।
मेयर साहले ११३०७ मत ल्याएर विजयी भएका छन् भने उनका निकटम प्रतिस्पर्धी नेपाली कांग्रेसका अचमित लाल चौधरी ९१३८ मत पाएका छन् । यस्तै उपमेयर चौधरीले १११६८ मत ल्याएकी छिन् भने उनकी निकटम प्रतिस्पर्धी कांग्रेसकी पूनम चौधरी ९९०६ मत पाएकी छन् । मेयर साह २१६९ र उपमेयर चौधरी १२६२ मतको मतान्तरले विजयी भएको निर्वाचन अधिकृतको कार्यालयले जनाएको छ ।
लहान मधेस आन्दोलनको उद्गम स्थल हो तर मधेसवादी दल संघीय समाजवादी फोरम नेपाल तेस्रो, राजपा नेपाल छैठौं र फोरम लोकतान्त्रिक सातौं स्थानमा सीमति भएका छन् । ०६३ माघ ५ गते लहानमा विद्यार्थी रमेश महतो मारिएपछि पहिलो मधेस आन्दोलन सुरु भएको थियो ।
एमालेले यसअघि सिरहाको सुखिपुर नपा, नरहा गाउँपालिका र सखुवा ननकारकट्टी गाउँपालिकामा जित हासिल गरिसकेको छ । सिरहाका १७ तहमध्ये १५ तहको परिणाम सार्वजनिक हुँदा माओवादी केन्द्रले मिर्चैया नपा, कर्जन्हा नपा, धनगढीमाई नपा, औरही र अर्नमा गाउँपालिकामा कब्जा जमाइसकेको छ ।
संघीय समाजवादी फोरम भने बरियारपट्टी, लक्ष्मीपुर पतारी, भगवानपुर र विष्णुपुर गाउँपालिका जितेको छ । यस्तै काँग्रेसले दुई स्थानीय तह नवराजपुर गाउँपलिका र कल्याणपुर नगरपालिकामा जित निकालेको छ । राजपाले हालसम्म एक सिट पनि जित्न सकेको छैन् ।
अब सिरहाका दुई स्थानीय तह गोलबजार र सिरहा नगरपालिकाको मात्र मतपरिणाम सार्वजनिक हुन बाँकी छ । गोलबजारमा माओवादी केन्द्र सुरुदेखि नै अग्रता लिएको छ भने सिरहा नगरपालिकामा आज विहानबाट संघीय समाजवादी फोरमले अग्रता लिएको छ ।
प्रतिक्रिया दिनुहोस !
