नेपाल आइडलको भुल्न नहुने पाटो

अन्नपूर्ण मिडिया नेटवर्कअन्तर्गतको एचडी टेलिभिजन एपीवानबाट प्रसारित नेपाल आइडलको पहिलो सिजन सकिएको छ । पहिलो नेपाल आइडल बन्न सफल भएका छन्, गायनमा संघर्षरत नवप्रतिभा, बुद्ध लामा । धादिङमा जन्मिएर पोखरामा हुर्किएका लामासँगै अरू केही आशालाग्दा अनुहार नेपाल आइडलको मञ्चमार्फत नेपाली सांगीतिक क्षेत्रले पाएको छ । मोरङका निशान भट्टराई, ललितपुरका प्रताप दास र केन्जलमेहर श्रेष्ठ, चितवनका सागर आले, रूपन्देहीकी सुजाता पाण्डे, झापाकी दृष्टिविहीन मेनुका पौडेल र बाँकेका सुरज थापालगायतका थुप्रै नवप्रतिभा आफ्नो क्षमता प्रदर्शन गरेर ‘सेलिब्रेटी’ बनेका छन् ।

लुकेर बसेका संघर्षरत यी प्रतिभालाई क्षमता प्रदर्शन गर्ने मञ्च दिलाउन नेपाल आइडल सफल भएको छ । यस अर्थमा अन्नपूर्ण मिडिया नेटवर्कले व्यावसायिक सफलतासँगै नेपालको सांगीतिक क्षेत्रलाई थोरै योगदान गरेको र धेरै आशा जगाएको छ ।नेपाल आइडल नेपाली टेलिभिजन इतिहासमा भित्रिएको पहिलो अन्तर्राष्ट्रिय ‘फ्रेन्चाइज शो’ हो । यो पहिलो भएकै कारण यसप्रति दर्शक औधि आकर्षित भए । थोरै अवधिमा एपीवान टेलिभिजनले लाखौं दर्शक, शुभेच्छुक कमायो पनि ।

आइडलको फिनालेमा भएको व्यवस्थापकीय÷प्राविधिक कमजोरी र त्रुटिका कारण धेरैले खल्लो महसुस गरे । कतारको दोहाबाट प्रत्यक्ष प्रसारण गर्ने उत्साहजनक तयारी प्राविधिक त्रुटिका कारण निराशामा बदलियो । दर्शक, शुभेच्छुकसँगै अन्नपूर्ण मिडिया स्वयं यसबाट आघात महसुस गरिरहेको छ । अन्नपूर्ण मिडिया नेटवर्कका अध्यक्ष क्याप्टेन रामेश्वर थापाले टेलिभिजन र पत्रिकामार्फत आम दर्शक र शुभेच्छुकसँग क्षमायाचना गरिसकेका छन् । क्याप्टेन थापाले यो त्रुटिलाई अन्नपूर्ण मिडिया नेटवर्कले गम्भीरतापूर्वक लिएको छ र यसलाई पाठका रूपमा लिएर आगामी दिनमा परिस्कृत र परिपक्व भएर अघि बढ्ने प्रतिबद्धता जनाएका छन् । त्रुटि÷कमजोरीबाटै सिक्दै अघि बढ्ने हो । त्यसकारण फिनालेमा भएको त्रुटिलाई अघि सारेर नेपाल आइडलले नेपाली सांगीतिक क्षेत्रमा पुर्‍याएको योगदानको नजरअन्दाज गरिनु हुँदैन ।

नेपाल आइडलले केही महत्वपूर्ण सकारात्मक सन्देश दिएको छ– प्रथमतः अन्तर्राष्ट्रिय रूपमा सफल कार्यक्रम नेपालीकरण गरेर नेपाली दर्शकको मन जित्ने गरी सञ्चालन गर्न सकिँदो रहेछ । दोस्रो– नेपालमा पनि सम्भावना बोकेका प्रतिभा छन् । तिनीहरू उचित मौकाको खोजीमा छन् । अवसर पाए आफूलाई अब्बल सावित गर्न सक्दा रहेछन् । तेस्रो– दह्रो इच्छाशक्ति र रचनात्मक सोच भए आर्थिक र भौतिक समस्या र सीमितता जुट्दै जा“दा रहेछन् । यी केही महत्वपूर्ण सन्देश नेपाल आइडलको हकमा मात्रै लागू हुँदैनन् । नेपालमा थुप्रै क्षेत्रमा लुकेका प्रतिभा अवसरको खोजीमा छन् । तिनलाई उचित अवसर र मञ्च प्रदान गर्ने हो भने कला, संस्कृति, विज्ञान, प्रविधिलगायतका अरू क्षेत्रमा बुद्ध लामाहरू जन्मिन्छन् भन्ने सन्देश नेपाल आइडलले दिएको छ, जुन सकारात्मक छ ।

संविधानमा नेपाललाई कल्याणकारी राज्य भनिएको छ । गाँस, वास, कपास, शिक्षा, स्वास्थ्यलगायत रोजगार र सामाजिक न्यायको सुनिश्चितता गर्ने विभिन्न ३१ वटा मौलिक हकको व्यवस्था गरिएको छ, तर व्यवहारमा आधारभूत अधिकार पनि नागरिकलाई प्राप्त हुन सकेको छैन । कमजोर आर्थिक अवस्था भएका परिवारका बालबालिका पनि आधारभूत आवश्यकताबाट वञ्चित छन् । पढ्ने र विविध क्षमता विकास गर्ने कुरा कागजमै सीमित छ । यस अवस्थामा निजी क्षेत्रले क्षमतावान् प्रतिभा बाहिर ल्याउन गरेको यो प्रयास स्तुत्य छ । तर व्यवस्थापकीय वा प्राविधिक त्रुटिका आधारमा यस्तो प्रयासको अवमूल्यन गरिनु हुँदैन ।