अशोभनीय अभिव्यक्ति
तेस्रो चरणको स्थानीय तह निर्वाचनमा अपेक्षाकृत जित हासिल गर्न नसकेपछि राजपा अध्यक्ष महन्थ ठाकुरले संविधान नस्विकार्ने पुरानै रटान दोहोर्याएका छन् । संविधानतः चुनावमा सहभागी भएर अपेक्षाकृत विजय प्राप्त नभइसकेपछि यसखाले अभिव्यक्ति आउनु शोभनीय होइन ।
मधेसकेन्द्रित दलको मागलाई सम्बोधन गर्न संविधान संशोधन प्रस्ताव दर्ता गरिएको र संसद्को आवश्यक मत नपुगेपछि उक्त प्रस्ताव पारित नभएको तथ्य जगजाहेरै छ । प्रक्रिया अघि बढेपछि राजपा चुनावमा जान राजी भएको थियो । चुनावी नतिजा निराशाजनक देखिएपछि संविधानकै मुद्दालाई लिएर विवाद निम्त्याउनु जायज होइन ।
राजपाले संविधानमा रहेका असन्तुष्टिलाई मुद्दाका रूपमा फेरि पनि प्रदेश र केन्द्रका चुनावमा लैजान सक्छ । संघीय समाजवादी फोरम र जनअधिकार फोरम लोकतान्त्रिकले पहिलो चरणदेखि नै चुनावमा सहभागी हुँदै संविधान संशोधनका माग पूरा हुनुपर्ने अडान लिँदै छन् । तीन चरणमा सम्पन्न स्थानीय चुनावले दिएको महत्वपूर्ण सन्देश संविधान पूर्ण कार्यान्वयन हो ।
प्रदेशसभा र प्रतिनिधिसभाको चुनावपछि मात्र संविधानको स्थायित्वतर्फको यात्रा बढ्नेछ । यसले प्राप्त पछिल्ला उपलब्धिलाई संस्थागत गर्नेछ । राजनीतिक उपलब्धि संस्थागत हुने यात्रा बढिरहँदा संविधान मान्दिनँ भन्नु शोभनीय होइन । यस अर्थमा महन्थका अभिव्यक्ति राजनीतिक संस्कारअनुरूप छैन ।
स्थानीय चुनाव र त्यसपछि हँदै गरेका चुनावले संविधानको स्वीकार्यता बढाउँछन् । चुनावी नतिजालाई विश्लेषण गर्दा त्यो प्रस्ट हुन्छन् । स्थानीय निर्वाचनमा गणतन्त्रको आन्दोलन र संविधान निर्माणमा संलग्न दलले ८८ प्रतिशतभन्दा बढी स्थानमा जितेका छन् । प्रदेश २ मा भएको स्थानीय तह निर्वाचनको केही मतपरिणाम आउन बाँकी रहँदासम्म ७ सय ५३ मध्ये संविधान पक्षधर दलले ६ सय ६४ स्थानीय तहमा विजय हासिल गरिसकेका छन् ।
यो सन्दर्भमा राजपा नेपाललगायत संविधान अस्वीकार गर्छौं भन्ने शक्तिले बुझ्नुपर्छ, लोकतन्त्र बहुमतको शासन हो । निश्चय पनि अल्पमतका कुरा सुनिनुपर्छ । तिनलाई सम्बोधन गर्दै लैजाने दायित्व बहुमतको शासन सञ्चालन गर्नेहरूको हो । यद्यपि, विधिसम्मत ढंगबाट प्रक्रिया टुंगो लागेपछि पनि अल्पमतले ढिपी गरिरहनु स्वीकार्य हँदैन ।
हामी लोकतान्त्रिक पद्धतिको अभ्यास र अनुसरण गरिरहेका छौं र यहाँ आफ्ना माग र असन्तुष्टि प्रकट गर्ने मञ्च छन् । स्थानीय तहका र त्यसपछिका चुनाव दलहरूका लागि आफ्ना मुद्दा अघि सार्ने र जनताद्वारा अनुमोदित गराउने उपयुक्त अवसर हुन् । त्यसलाई उपयोग गर्नेतर्फ उनीहरू केन्द्रित हुनुपर्छ । पराजयपछिको आवेगपूर्ण अभिव्यक्तिले अन्ततः राजपालाई नै राजनीतिक बेफाइदा हुनेछ भन्ने हेक्का राख्नु जरुरी छ ।
प्रदेश २ को स्थानीय तह निर्वाचनको परिणाम आउने क्रम अन्तिम चरणमा छ । यो सँगै संविधान कार्यान्वयनको एक महत्वपूर्ण अध्याय सफलतापूर्वक सम्पन्न भएको छ । मंसिर १० र २१ का लागि तय भएका प्रतिनिधिसभा र प्रदेशसभाको निर्वाचनले संविधान र संघीयता कार्यान्वयनको अर्को महत्वपूर्ण चरण पूरा गर्नेछन् । मधेसमा पटक-पटक आन्दोलन गरेका मधेसकेन्द्रित शक्तिले प्राप्त उपलब्धि जोगाउने विषयलाई उच्च प्राथमिकतामा राख्नुपर्छ । त्यसकारण पनि ठाकुरका अभिव्यक्ति उचित लाग्दैन ।
प्रतिक्रिया दिनुहोस !
