दसैंमा बैंकहरू खुल्ने

काठमाडौं : दसैंमा अधिकांश वाणिज्य बैंकले कार्य सञ्चालन गर्ने भएका छन् । आम ग्राहकको सहजताका लागि बैंकहरूका मुख्य शाखा सञ्चालन गर्न लागिएको नेपाल बैंकर्स एसोसिएसनका अध्यक्ष अनिलकेशरी शाहले जानकारी दिए । ‘दसैंभरि नै धेरैजसो बैंकहरूले दुई÷तीन घन्टा बैंक शाखा खोल्ने तयारी गरिसकेका छन्’, उनले भने, ‘दसैंभरिनै चेक क्लियरिङ हुन्छ । ठूला सहरहरूका मुख्यमुख्य शाखा खुल्ने भएका छन् ।’

यसका साथै सरकारी खाता रहेका बैंकका शाखाले दसैंभरि नै कार्य गर्नेछन् । देशको राजस्व संकलनमा कुनै बाधा व्यवधान नआओस् भन्नका लागि नाकाका बैंक शाखाहरू खुलाउन राष्ट्र बैंकले पनि निर्देशन दिएको छ ।

 

केही वर्ष अघिसम्म दसैंका बेला सुनसान रहने बैंकहरू राष्ट्र बैंकको निर्देशन र आम ग्राहकको मागअनुसार पछिल्ला वर्षहरूमा बैंक शाखा खोल्दै आएका छन् । नेपाल राष्ट्र बैंकले पनि बैंकहरूलाई विशेष शाखाहरू खोलेर सेवा मिलाउन निर्देशन दिएको छ ।

दसंैमा सानिमा बैंकले बिहान ११ बजेदेखि २ बजेसम्म सेवा दिने भएको छ । बंगलादेश बैंकले पनि बिहान ११ बजेदेखि एक बजेसम्म बैंक खुलाउने तयारी गरेको छ । बंगलादेश बैंकले दसैभरिकै शाखा दैनिक ११ बजेदेखि १ बजेसम्म बैंक शाखा खोल्ने भएको छ भने मेगा, सानिमा, एनआईसी एसिया, प्रभु, एभरेस्ट, सिटिजन, नेपाल इन्भेस्टमेन्टलगायतका बैंकले निश्चित अवधिभर निश्चित शाखाबाट ग्राहकलाई सेवा दिने कार्य तालिका बनाएका छन् ।

दसैंको लामो बिदाका समयमा उपभोक्ताहरूलाई बैंकिङ कारोबारमा सहजता होस् भन्ने उद्देश्यले नेपाल इन्भेस्टमेन्ट बैंकले देशभरका आफ्ना विभिन्न स्थानका २२ वटा शाखा खुला राख्ने भएको छ । सबै बिदाका दिन बैंकको मुख्य कार्यालय दरबारमार्ग बिहान ९ देखि १२ बजेसम्म खुल्नेछ ।

यसैबीच बैंकले काठमाडौंको ठमेलस्थित सातघुम्तीमा आफ्नो ९९औं एटिएम सेवा विस्तार गरेको छ । पर्यटकको बक्लो आवतजावत हुने ठमेलमा स्थानीय उपभोक्तालाई तत्काल बैंकिङ कारोबार गर्न सजिलो होस् भन्ने उद्देश्यले एटीएम सेवा विस्तार गरिएको हो । बैंकले यसअघि देशका विभिन्न स्थानमा रहेका ९८ वटा एटीएममार्फत आफ्ना उपभोक्तालाई बैंकिङ सेवा दिँदै आएको छ ।