चीनमा ६८ औं राष्ट्रिय दिवस मनाइँदै

बेइजिङ : चीनले आफ्नो स्थापनाको ६८ औँ राष्ट्रिय दिवस मनान शुरु गरेको छ । राष्ट्रिय दिवस मनाउने एक साताव्यापी कार्यक्रम आइतबारबाट शुरु भएको छ ।चीनले अफ्नो स्थापनाको ६८ औँ दिवस मनाउन चीनको तियानमेन स्क्वायरमा विशेष कार्यक्रम गरेको थियो । बादशाही शासनकालबाट मुक्त भई जनवादी गणतन्त्र चीन स्थापना भएको ६७ वर्ष पुगी ६८ औं वर्ष प्रवेश भएको हो ।

तियानमेन स्क्वायरमा आइतबार बिहान ६:०५ बजे विशेष समारोहको आयोजना गरी समारोहमा झण्डोत्तोलन गरिएको थियो । राष्ट्रिय झण्डोत्तोलन अवलोकन गर्न देशभरबाट करिब १ लाख १५ हजार मानिसहरू बेइजिङको तियान्मेन चोकमा भेला भएका थिए । प्रत्येक वर्ष तियानमेन स्क्वायरमा चीनको राष्ट्रिय दिवस मनाउन यस्तै विशेष कार्यक्रमको आयोजना गर्ने गरिएको छ । तियानमेन स्क्वायर चीनको राजनीतिक परिवर्तनमा विशेष स्थान मानिन्छ ।

सो स्थानमा आइतबार बिहान चिनियाँ सैनिकले झण्डा उठाएर चीनको स्थापना दिवसको स्वागत गरेपछि विशेष सैनिक परेड शुरु भएको थियो । राष्ट्रिय झण्डोत्तोलनका क्रममा, १७ मिटर (५६ फिट) अग्लो पारी झण्डाको पृष्ठभूमिमा झुण्ड्याइएका विभिन्न फल र पूmलः पाँचवटा ताराको प्रतीकस्वरूप - हलुवाबेद, अनार, स्याउ, पियोनी (विशेष प्रकारको चिनियाँ फूल) तथा चिनियाँ गुलाफको फूलका विशाल टोकरीबाट पुष्प र फलको वृष्टि गरिएको छ ।

शान्ति, समृद्धि र प्रगतिको प्रतिकका रूपमा ती फल र फूलहरू प्रदर्शन गरिएको थियो । त्यहाँ उपस्थित नागरिकहरूले राष्ट्रभक्तिका अभिव्यक्तिहरू दिने तथा तियानमेन स्क्वायरको ऐतिहासिकता झल्काउने गरी राखिएका प्राचीन बस्तु, पुराना दरबार तथा बनोटहरू हेर्ने गर्दछन् । चोकमा भेला भएका अपार जनसमूहले देशभक्ति तथा राष्ट्रप्रेमले ओतप्रोत भई मौनतापूर्वक उक्त कार्यक्रम अवलोकन गरेका छन् ।

राष्ट्रिय दिवसको उपलक्षमा चीन सरकारले देशभर साताव्यापी सार्वजनिक बिदाको घोषणा गरेको छ । यस वर्षको परम्परागत चिनियाँ मध्य-शरद पर्व (मिड-अटम फेस्टिभल) वा मुन केक फेस्टिभल आगामी अक्टोबर ४ मा पर्दै छ । त्यसै पर्वलाई समेत ध्यानमा राखी उक्त सातदिने सार्वजनिक बिदाको घोषणा गरिएको हो । चीनमा मिड-अटम वा मून केक फेस्टिभलमा परिवारका सदस्यहरू जहाँ भए पनि एकै ठाउँमा भेला भई मनाउने गरिन्छ ।   रासस/सिन्ह्वा