वाम तालमेल घोषणाले रोल्पामा हर्षसँगै आशंका

रोल्पा : आसन्न संघीय सभा र प्रदेश सभाको चुनावमा वाम तालमेल गर्ने र चुनाव पश्चात पार्टी एकता गर्ने घोषणाले रोल्पाका एमाले र माओवादी केन्द्रका नेता कार्यकर्तामा हर्ष र आशंका जन्माएको छ ।'वाम तालमेल गरिने र चुनाव पश्चात पार्टी एकता गर्ने घोषणाले खुशी भएका छौं ।', नेकपा माओवादी केन्द्रका जिल्ला अध्यक्ष सुरेन्द्र थापा' भन्छन्, 'हामी सधैं वाम ध्रुवीकरण हुनुपर्छ भन्ने पक्षमै थियौं । नेताहरुले सरप्राईज जस्तै गरी चुनावी तालमेल र एकताका लागि घोषणा गर्दा हर्षित नै छौं ।' केन्द्रीय शीर्ष नेताहरुको जुँगाको लडाइ र त्यागको अभावमा पार्टी एकता हुने विषय तुहिन्छ कि भन्ने आशंका भने जिल्लाका नेता कार्यकर्तामा छ ।

 

नेकपा एमालेका जिल्ला अध्यक्ष हरिप्रसाद घर्तीमगरले पनि वाम तालमेल र एकता गर्ने घोषणाले रोल्पाका एमाले नेता, कार्यकर्ता र समर्थकमा खुशीयाली छाएको बताए । 'वाम ध्रुवीकरण गर्दै पार्टी एकता हुनुपर्छ भन्दै एमाले जिल्ला कमिटीले केन्द्रमा पटकपटक सुझाव दिँदै आएको थियो । ढिलै भएपनि त्यसको सुनुवाई भएको महशुस गरेका छौं ।', एमालेका अध्यक्ष घर्ती भन्छन, 'वाम तालमेल र एकता गर्ने कुरा सुनेर गाउँगाउँबाट एमालेका नेता कार्यकर्ताले मलाई फोन गरेर हर्षित भएको सुनाईरहेका छन ।'

वाम तालमेलको घोषणापछि एमाले र माओवादी केन्द्रका जिल्ला अध्यक्षहरुले भेटघाट भने गरेका छैनन् । आ-आफ्ना कार्यकर्ताको जिज्ञासा मेटाउने र खुशी साटासाट गर्नमै व्यस्त रहेका छन । दुवै पार्टीका जिल्ला स्तरका नेताले वाम ध्रुवीकरण राष्ट्र र जनताको आवश्कता भएको बताएका छन । दुवै पार्टीका नेता कार्यकर्तामा नेतृत्व र शीर्ष नेताको त्याग, तपस्या र समर्पणको अभावले वाम एकता नहुने हो कि भन्ने आशंका रहेको देखिन्छ । 'वाम एकता गर्नका लागि नेताहरुले पद त्याग्न सक्नु पर्छ । त्यसो भएन भने त्यागकै अभावले वाम एकता तुहिन सक्छ ।' एमालेका क्षेत्र नं. २ का निवर्तमान क्षेत्रीय अध्यक्ष प्रेमबहादुर घर्ती भन्छन, 'कार्यकर्ता तह जहिल्यै वाम एकताकै पक्षमा थियौं । नेताहरु नमिलेर मात्र समस्या देखिएको थियो । अब नेताहरुले नै घोषणा गरेपछि आशा जागेको छ ।'

माओवादी केन्द्रका जिल्ला सचिव एवम् रोल्पा नगरपालिकाका मेयर पुरण केसीले पनि विगतको जस्तै छलकपटले वाम एकता नहुँने अवस्था आउन नहुने बताउँछन । 'जनताको समाजवादको सपना पूरा गर्न नेपालमा मजवुद खालको एउटै कम्युनिष्ट पार्टीको आवश्यता छ । अवब एकता हुनैपर्छ ।', सचिव केसी भन्छन् । कार्यकर्ताबाट वाम तालमेल र पार्टी एकताबारे मिश्रित प्रतिक्रिया आइरहेको सचिव केसी बताउँछन । 'आकस्मिक रुपमा केन्द्र तहबाट घोषणा भएकाले कार्यकर्ता तहमा सकारात्मक र नकारात्मक दुवै प्रतिक्रिया आइरहेको छ।' सचिव केसी थप्छन, 'कार्यकर्ता र जनस्तरमा माहौल बनाउने अनि नेताको जुँगाको लडाइले एकताको लक्ष्य भत्किनु हुँदैन ।'

स्थानीय तहको चुनावमा एमाले र माओवादी केन्द्रबीच तीव्र मतभेद देखिएकाले कार्यकर्ता तहमा अझै मनोमालिन्या कायम भएको छैन । एकआपसको सम्बन्ध सुमधुर नभइसक्दै एक्कासी चुनावी तालमेल र अन्ततः पार्टीको घोषणाले कतिपय कार्यकर्ता रुष्ट बनेका छन । जिल्लामा माओवादी पहिलो दल छ भने एमाले तेस्रो । एमाले र माओवादी केन्द्रको तालमेल हुँदा भारी मत हुने दुवै पार्टीको दाबी छ ।

एमालेले ६० र केन्द्रले ४० प्रतिशत उम्मेदवार तालमेल गर्ने बारे भने जिल्लामा अन्यौलता देखिएको छ । जिल्ला र निर्वाचन क्षेत्रमा जुन पार्टीको पकड छ त्यहाँ त्यहीँ पार्टीलाई उम्मेदवार बनाउने या प्रत्येक जिल्लामा ६० र ४० प्रतिशत लागु हुने बारे भने दुवै पार्टीमा अन्यौलता देखिन्छ ।