लग भेगस आक्रमणमा नरसंहारको योजना थाहा नभएको दाबी

लस भेगस : अमेरिकी सहर लस भेगसमा आइतबार राति भीषण आक्रमण गरी ५९ जनाको ज्यान लिने स्टेफन पेडककी केटीसाथीले यस्तो आक्रमण र नरसंहारको पेडकले योजना बनाएको बारेमा आफूलाई केही थाहा नभएको बताएकी छिन् ।

 बन्दुकधारीले लस भेगसमा गरेको आक्रमणको उद्देश्य पत्ता लगाउने प्रयासस्वरूप प्रहरीले उनीहसँग पनि आवश्यक सोधपुछ गरेको थियो । प्रहरीसँगको बयानमा उनले यस्तो जानकारी दिएको बताइएको छ । उनकी केटीसाथी मार्लाे डेन्लीसँग प्रहरीले बुधबार सोधपुछ गरेको छ । सोधपुछका क्रममा उनले यस्तो हिंसात्मक गतिविधिको बारेमा आफूलाई थाहा नभएको बताइन् । उनले भनिन्, ‘यतो योजनाको बारेमा पनि उनले मलाई केही थाहा दिएका थिएनन् ।'

अमेरिकी प्रहरीसँगको बयानका क्रममा उनले यस्तो जानकारी दिएको उनका वकिलले बताएका छन् । उनको यो बयानपछि उक्त हत्याकाण्ड थप रहस्मय बन्न पुगेको पनि समाचारमा उल्लेख छ । अमेरिकी सरकारी वकिलले पनि मार्लो डेन्लीले यसअघि उनको स्वभाव स्नेही र दयालु रहेको तर यस्ता हिंसात्मक क्रियाकलापका बारेमा कहिल्यै पनि कुनै कुरा आदानप्रदान नगरेको बयान उनले दिएको जनाएका छन् । मार्लो हाल फिलिपिन्समा बस्दै आएकी छिन् । उनी अस्ट्रेलियाली नागरिक हुन् । उनी करिब २० वर्षअघि क्यासिनोमा काम गर्न भन्दै अमेरिका पुगेको अस्ट्रेलिया सरकारले जानकारी दिएको थियो ।

पेडकले लस भेगसमा आइतबार राति भएको कन्सर्ट (सांगीतिक प्रस्तुति) को समयमा जम्मा भएका सयौँ व्यक्तिमाथि गोली चलाएका थिए । उनले चलाएको अन्धाधुन्ध गोलीबाट ५९ जनाको ज्यान जानुका साथै ५०० भन्दा बढी घाइते छन् । उनी बसेको सोही होटलको ३२ औँ तलाबाट अत्याधुनिक बन्दुकले आक्रमण गरेका थिए । अमेरिकी प्रहरीले उनकी केटीसाथी ६२ वर्षीया मार्लोलाई हिरासतमा लिएको छैन ।
प्रहरीले उनीसँगको सम्बन्धका बारेमा बुझेको थियो । पेडकले नरसंहार गर्नुअघि आफ्नी केटीसाथीलाई एक लाख अमेरिकी डलर पठाएको तथ्य प्रहरीले भेटेको थियो । त्यसैका आधारमा उक्त हमलामा उनलाई पनि कुनै सूचना हुनसक्ने अनुमानका आधारमा उक्त कुरा बुझ्न खोजेको हो । प्रहरीले अनुसन्धान जारी राखेको जानकारी दिएको छ । पेडकले नरसंहार किन गरेका थिए भन्ने तथ्यको नजिक पुग्न सकेको छैन ।