राष्ट्रपतिले पूजा गरिन,भट्टराई र श्रेष्ठले गरेनन् पूजा
पालुङ्टार (गोरखा) : राष्ट्रपति बिद्यादेवी भण्डारीले शैक्षिक तथा धार्मिक महोत्सवको उदघाटन गरेकी छिन् । भवानी बहुमुखी क्याम्पसको शैक्षिक तथा भौतिक सुधारका लागि महोत्सव आयोजना गरिएको आयोजक समितिका संयोजक प्रकाश शरण खनालले जानकारी दिए ।
महोसत्वमा सहभागी हुन नेकपा माओवादी केन्द्रका नेता नारायणकाजी श्रेष्ठ र नयाँ शक्ति नेपालका संयोजक बाबुराम भट्टराई पनि पालुङटार पुगेका छन् । राष्ट्रपति भण्डारीले पूजा गरेपनि श्रेष्ठ र भट्टराईले भने पूजा गरेनन ।
राष्ट्रपति भण्डारीका लागि महोत्सव स्थलको सुरक्षा ब्यबस्था कडा पारिएको छ । दिनहूँजसो जिल्ला प्रशासन कार्यालय, नेपाली सेना, नेपाल प्रहरी, सशस्त्र प्रहरी, राष्ट्रिय अनुसन्धानबाट अनुगमन तथा सुरक्षा जाँच हुने गरेको सहायक प्रमुख जिल्ला अधिकारी केशव शर्माले जानकारी दिए ।
शैक्षिक तथा धार्मिक महोत्सव एकसातासम्म सञ्चालन हुनेछ । महोत्सवमा गोविन्दशरण महाराजजीले कथावाचन गर्ने कार्यक्रम छ । गोविन्दशरण महाराजजी १०८ राष्ट्रशान्ति शैक्षिक तथा धार्मिक महोत्वसका संकल्पकर्ता, ७५ वटै जिल्लामा नमूना शैक्षिक संस्था निर्माणका संकल्पकर्ता, ५० वटा देशमा विश्वशान्तिका संकल्पकर्ताको रुपमा परिचित छन् ।
महोत्सवमा राष्ट्रपतिद्वारा यज्ञकुण्ड, हवनकुण्डमा पूजा, हवन तथा अवलोकन गरेकी छिन् ।
महोत्सवको हरेक दिन बिहान २२०० शान्ति कलस यात्रा गरिनेछ । दिनहूँ योग शिवर, भजन समूहद्वारा भजन, संगीतमय धार्मिक, पौराणिक कथाप्रवचन, १०८ सालिग्रामको दर्शन तथा प्रदक्षिणा, आकासद्वीप प्रज्ज्वलन, सामुहिक व्रतवन्ध, विवाहका कार्यक्रम, लक्ष्यवर्ती(लाखवत्ती) प्रज्ज्वलन हुने महाराजजीका सचिव कोषबहादुर खड्काले जानकारी दिए ।
महोत्सवबाट क्याम्पसका लागि करिब तीन करोड रुपियाँ संकलन गर्ने आयोजकले लक्ष्य राखेको छ । महोत्सव सञ्चालनका लागि करिब ४५ लाख खर्च हुने मूल आयोजक समितिका संयोजक खनालले जानकारी दिए ।
भवानी सामुदायिक बहुमुखी क्याम्पस बिगत ११ बर्षदेखि सञ्चालन भएको हो । यसलाई गोरखा, लम्जुङ र तनहूँको शैक्षिक केन्द्र बनाउने गरी गुरुयोजना तयार गरिएको आयोजकले जनाएको छ ।
प्रतिक्रिया दिनुहोस !
