राप्रपालाई यसरी फकाउँदै देउवा

काठमाडौं : प्रधानमन्त्री शेरबहादुर देउवाले लोकतान्त्रिक गठबन्धनलाई मजबुत गराउने उद्देश्यका साथ राष्ट्रिय प्रजातन्त्र पार्टीका अध्यक्ष कमल थापालाई सरकारमा आउन आग्रह गरेका छन् । थापासँग आइतबार अपराह्न भएको भेटमा देउवाले यस्तो गरेका हुन् ।

प्रधानमन्त्रीले सरकारमा सहभागी हुन गरेको आग्रहलाई सकारात्मक रूपमा लिँदै थापाले सोमबार बिहान पार्टी कार्यसम्पादन समितिको बैठक बोलाएका छन् । उक्त बैठकले सरकारमा जाने निर्णय गरेमा थापालाई महत्वपूर्ण मन्त्रालय दिएर सरकार पुनर्गठन हुने स्रोतको दाबी छ ।

राप्रपा उच्च स्रोतका अनुसार माओवादी मन्त्रीलाई हटाउन देउवाले सरकार विस्तार नभएर पुनर्गठन गर्ने भएका छन् । पुनर्गठित सरकारका थापालाई उपप्रधान एवं गृहमन्त्री बनाउने प्रवल सम्भावना छ । थापाले देउवासँग गृहसहित पाँचवटा मन्त्रालयको जिम्मेवारी मागेका छन् । राप्रपाका नेता एवं सामाजिक न्याय तथा मानव अधिकार समितिका सभापति सुशीलकुमार श्रेष्ठले सोमबार बिहान बस्ने पार्टी कार्यसम्पादन समितिको बैठकले प्रधानमन्त्रीबाट सरकारमा सहभागी हुन गरेको आग्रहसहितको प्रस्तावमा निर्णय हुन सक्ने बताए । ‘प्रधानमन्त्रीले सरकारमा सहभागी माओवादीलाई फिर्ता गराउँदै सरकार पुनर्गठन गर्दै छन् । आफूहरूले पाएको सूचनाअनुसार सरकार विस्तार होइन, पुनर्गठन हुन सक्छ’, उनले भने ।

प्रधानमन्त्री देउवा र अध्यक्ष थापाबीच सरकारमा रहेको दोस्रो घटकले निर्वाचन तालमेल र त्यसपछि पार्टी एकताभन्दै प्रमुख प्रतिपक्षी दलसँग गइसकेको अवस्थामा सरकार पुनर्गठन गर्नु उपयुक्त हुने परामर्श गरेको दाबी स्रोतले गरेको छ । एमाले र माओवादीले निर्वाचनका समयमा सरकार गठन, पुनर्गठन, विस्तारलगायत कार्य गर्न पाइँदैन भन्दै चलाएको चर्चाप्रति देउवा र थापाबीच लामो परामर्श भएको बताइएको छ ।

संविधानविद्हरूसँग विभिन्न समयमा अनौपचारिक परामर्श गरेका देउवा र थापा अन्ततः निर्वाचनका समयमा पनि सरकार विस्तार, पुनर्गठन गर्न मिल्नेमा एकमत भएका थिए । प्रधानमन्त्रीसँगको भेटमा थापासँगै सहभागी लोकतान्त्रिक गठबन्धन कार्यदलका सदस्य बुद्धिमान तामाङले देउवा र थापाबीच प्रतिनिधिसभा र प्रदेशसभाको सिट तालमेलका सम्बन्धमा मात्र वार्ता भएको बताए ।

‘हिन्दुका मागमा सकारात्मक’

राप्रपाका अध्यक्ष थापाले संविधानमा धर्मनिरपेक्षताको ठाउँमा हिन्दु धर्म र गणतन्त्रको ठाउँमा संवैधानिक राजतन्त्रका विषयमा वामपन्थी र लोकतान्त्रिक जुन गठबन्धनले स्विकार्छ, त्यसैको पक्षमा लाग्ने प्रस्ताव पटक-पटक लगेका थिए । थापाको प्रस्तावलाई प्रधानमन्त्री देउवा र एमाले अध्यक्ष केपी शर्मा ओलीले अस्वीकार गरेको राप्रपा उच्च स्रोत बताउँछ ।

यद्यपि, राप्रपाले आफ्नो चुनावी मुद्दा भने ‘हिन्दु धर्म र राजतन्त्र’ कै विषयमा केन्द्रित गर्ने भएको छ । सोही चुनावी मुद्दाको कारण राप्रपाले संविधानसभाको दोस्रो निर्वाचनमा २५ सिट पाउन सफल भएको हो । प्रधानमन्त्री देउवाले अध्यक्ष थापालाई सरकारमा सहभागी हुन आग्रह गर्दा पनि थापाले हिन्दु र राजतन्त्रमा सकारात्मक हुन आग्रह गरेका थिए । देउवा राजतन्त्रको सवालमा पूरै मौन रहेका थिए । एक प्रश्नको उत्तरमा स्रोतले भन्यो, ‘राजतन्त्रमा मौन रहे पनि हिन्दु धर्ममा देउवाको पोजेटिभ बडी ल्यांग्वेज पाइयो ।’

थापाले देउवालाई कांग्रेस बीपीको कांग्रेस नबन्दा र भारतले नेपालको ‘टु पिलर सिस्टम’ नमानेको परिणाम मुलुकमा प्राप्त गणतन्त्रले स्थायित्व लिन नसकेको धारणा व्यक्त गरेका थिए । दुई खम्बे नीतिमा भारत गएको भए अहिले एमाले र माओवादी गठबन्धन हुने थिएन भन्ने कुरामा कांग्रेसलाई सोच्न आग्रह गरेका थिए । राप्रपाका नेता दिलनाथ गिरीले आफ्नो पार्टीले कांग्रेसको नेतृत्वमा रहेको लोकतान्त्रिक गठबन्धनलाई मजबुत गराउने बताए ।