एनसेल र आइफ्लिक्सबीच सहकार्य

काठमाडौं : एनसेल प्राइभेट लिमिटेडले आइफ्लिक्ससँग सहकार्य गरेको छ । यो सहकार्यपछि एनसेलका ग्राहकले बिहीबारदेखि तीन महिनासम्म आइफ्लिक्सको मज्जा लिन सक्नेछन् । तीन महिनासम्म राति १२ देखि बिहान ५ बजेसम्म एनसेलको डाटा सेवा प्रयोग गरी आइफ्लिक्समा रहेको कुनै पनि सामग्री निःशुल्क हेर्न तथा डाउनलोड गर्न सक्नेछन् । साथै एनसेलका फोरजी ग्राहकले हरेक दिन बिहान ५ बजेदेखि बेलुका ५ बजेसम्म थप दुई घण्टा आइफ्लिक्सको निःशुल्क मनोरञ्जन लिन सक्नेछन् ।

विश्वस्तरीय सेवासँग सहकार्य गर्न पाउँदा हर्षित भएको एनसेलले जानकारी दिएको छ । यो सेवाले डेटा तथा कन्टेन्टको बढ्दो मागलाई सम्बोधन गर्ने एनसेलका कर्पोरेट सर्भिसेस डाइरेक्टर प्रणय आचार्यले बताए ।

एनसेलले यस अवसरमा करसहित ५० रुपैयाँमा एक घण्टाको भिडियो प्याक पनि ल्याएको छ । यस प्याकअन्तर्गत ग्राहकले आईफ्लिक्सका कन्टेन्टमध्ये कुनै पनि सामग्रीको एक घण्टासम्म भिडियो हेर्न सक्नेछन् । ग्राहकले आवश्यकताअनुसार यो प्याक जतिपटक पनि लिन सक्नेछन् ।

विश्वका विभिन्न २ सय २० भन्दा बढी स्टुडियो तथा डिस्ट्रिब्युटरसँगको साझेदारीमा आइफ्लिक्सले अन्तर्राष्ट्रिय तथा स्थानीय टीभी सिरियल तथा सिनेमा देखाउनेछ । नेपालमा पनि आईफ्लिक्समार्फत थुप्रै चर्चित सिनेमा तथा टीभी सो सब टाइटलमा पनि उपलब्ध हुनेछन् ।
गुगल प्ले वा आईओएस एप्पल स्टोरमा गई सजिलै आइफ्लिक्स एप डाउनलोड गर्न सकिनेछ ।