करिनाको डाइटिङ सूत्र

बलिउडकी नायिका करिना कपुर खानले फेसबुक लाइभ च्याटमार्फत आफ्नो डाइटिङ सूत्र फ्यानसँग सेयर गरेकी छन् । उनको लाइभ च्याट आठ लाखभन्दा धेरैले एकैपटक हेरेका थिए । आफ्नो फिटनेस तथा पोषण डाइटिसियन गुरु रुजुला देविकरको निर्देशन पालना गरिरहेको उनले बताएकी छन् । करिना दिनको सुरुआत फलफूल खाएर गर्छिन् । भन्छिन्, ‘मेरो पहिलो प्राथमिकता कफी हैन, फलफूल हो ।’

करिनाले के खाने, कस्तो खाने, कति खाने, कति बेला खाने सम्पूर्ण कुरा रुजुलाले तय गरिदिएकी हुन्छिन् । रुजुलाका अनुसार करिना दिनको दुईपटक कफी पिउँछिन् । करिना लामो ग्लासमा एक ग्लास दूध पिउँछिन् तर रातमा मात्रै । उनको डाइटमा प्राय: भेजिटेबल समेटिएका हुन्छन् । दाल, खिचडी तथा फ्रेस फलफूल बढी खाने गर्छिन् । उनी भन्छिन्, ‘प्रोटिन कन्ट्रोल गर्नु एकदम उपयुक्त हुन्छ ।’

करिनाले गर्भवती भएको समयका केही अनुभव साट्दै भनिन्, ‘त्यो समयमा एकदमै भोक लागेको महसुस हुने र थकित भइरहने गथ्र्यो । रक्तचाप निकै घटेको थियो । सायद यस्तो समस्या धेरै आमालाई हुन्छ ।’ तर, यो समयमा करिनालाई रुजुलाले घरायसी समाधानका उपाय बताएकी थिइन् जसले तुरुन्तै तन्दुस्त बनाएको महसुस हुन्थ्यो उनलाई ।

करिना ताजा, स्थानीय र घरैमा पकाइएका खानेकुरामा जोड दिन्छिन् । घरैमा पकाएको खाना निरन्तर खानु राम्रो । ‘गर्भावस्थामा पाँच वर्षमा घट्ने क्याल्सियम एकैपटक घट्छ । त्यसैले यस्तो समयमा दूध खान एकदमै आवश्यक हुन्छ’, उनले आफ्नो अनुभव सुनाएकी छन । दूध एकदमै मन पर्ने र रोटीसँग घ्यू खान उनी मन पराउँछिन् । रुजुलाको सल्लाहमा उनी फ्याटलाई काट्न फ्याट खानुपर्ने विश्वास गर्छिन् र घ्यू खाँदै आएकी छन् ।

करिनालाई सबभन्दा सेक्सिएस्ट, स्लिम र फिट एण्ड फाइन चलचित्र ‘टसन’मा देखिएको यियो । सबैले उनको प्रशंसा गरेका थिए । उनले बच्चा पाइसकेपछि पनि आफू त्यो बेलाको जस्तै हुन चाहेको रुजुलासँग बताएकी थिइन् । त्यति बेलाझैं वर्कआउट र डाइट गर्न चाहे पनि रुजुलाले नियमपूर्वक डाइट र एक्सरसाइज गर्न सुझाइन् । करिना मासु खाँदिनन् । साइक्लिङ र योगमा पोख्त छिन् । प्रत्येक दुई घन्टामा केही न केही खाने गर्छिन् । उनी शरीरका प्रत्येक भागका लागि फरक खालको योग र अभ्यास गर्दै आएकी छन् ।