सैन्य अभ्यासविरूद्ध क्षेप्यास्त्र परीक्षण गर्दै उत्तर कोरिया

सोल : अमेरिका र दक्षिण कोरियाको संयुक्त सैन्य अभ्यासपूर्व उत्तर कोरियाले ब्यालिस्टिक क्षेप्यास्त्र परीक्षण गर्न थालेको सोलले जानकारी दिएको छ ।अमेरिकी नौसेनाले शुक्रवार आगामी सातादेखि दक्षिण कोरियासँग मिलेर सैन्य अभ्यास गर्ने चेतावनी दिएको थियो ।

त्यसैको प्रतिकार स्वरूप उत्तरले क्षेप्यास्त्र परीक्षण गर्न थालेको दक्षिणले शनिवार जानकारी दिएको हो । यसअघि नै उत्तर कोरियाले उनीहरूलाई कोरियाली प्रायद्वीपमा संयुक्त सैन्य अभ्यास नगर्न चेतावनी दिइसकेको छ । ‘डोंगा इलबो’ नामक दैनिक समाचार पत्रका अनुसार स्याटेलाइटबाट लिइएका तस्बिरहरूबाट यस्तो जानकारी मिलेको उल्लेख छ । उत्तर कोरियाले क्षेप्यास्त्रहरू प्योङयाङ र उत्तरी फायङन प्रान्ततर्फ लैजाँदै गरेका तस्बिर फेला परेका थिए । उत्तरले अमेरिका र दक्षिणलाई प्रभावित पार्ने आशंका गरिरहेका छन् ।

उक्त क्षेप्यास्त्र ह्वासङ-१४ अन्तरमहादेशीय क्षेप्यास्त्र हुन सक्ने बताइएको छ । यस क्षेप्यास्त्रले अमेरिकाको अलास्कासम्म मार हान्ने क्षमता राख्छ । उत्तर कोरियाली नेता किम जोङ उनले गत अगस्तमा अमेरिकी अधीनस्थ क्षेत्र ग्वाममाथि आक्रमण गर्ने धम्की दिएका थिए । ह्वासङ-१३ ले भने अमेरिकाको पश्चिमी तटसम्म मार हान्न सक्छ ।

दक्षिण कोरियाली रक्षा मन्त्रालयले भने यसबारेमा टिप्पणी गर्न अस्वीकार गरेको छ । उसले भनेको छ, ‘सेनाले दिएको सूचनाका बारेमा हामी टिप्पणी गर्न चाहँदैनौं । हामीले उत्तर कोरियाली गतिविधि निगरानी गरिरहेका छौं । गत महिना उत्तरले छैटौं एवं सर्वाधिक शक्तिशाली परमाणु बम परीक्षण गरेको थियो । यसबाट प्योङयाङ र अमेरिकाबीच तनाव बढेको छ । अमेरिकी प्रस्तावअनुसार संयुक्त राष्ट्रसंघले उत्तर कोरियामाथि कडा नाकाबन्दी लगाएको छ ।

अमेरिकाले जापान र दक्षिण कोरियाका साथ मिलेर संयुक्त सैन्य अभ्यास शुरु गरेको छ । यसमा अमेरिकी युद्धक विमान पनि थपेको छ । उक्त अभ्यास १६ अक्टोबरदेखि २६ अक्टोबरसम्म जापान सागर र पीत सागरमा हुँदै छ ।