आगलागीमा २७ को मृत्यु, संकटकाल घोषणा
लिस्बन: पोर्चुगलको उत्तरी तथा मध्य क्षेत्रका विभिन्न ठाउँमा भएका आगलागीबाट २७ जनाको मृत्यु भएपछि सरकारले संकटकाल घोषणा गरेको छ। देशका पाँच सयभन्दा बढी ठाउँमा आगलागी भएको र ५१ जना घाइते भएको त्यहाँका अधिकारीले बताएका छन् । प्रधानमन्त्री एन्तोनिया कोस्ताले ५ सय २० ठाउँमा लागेको अडढेलो नियन्त्रणमा लिन संकटकाल घोषणा गरेका हुन्।
राष्ट्रिय नागरिक संरक्षण प्राधिकरणले आगलागी नियन्त्रणका लागि प्रयास भइरहेको जनाएको छ । प्राधिकरणका प्रवक्ता प्यात्रिकिआ गास्परले विनाशकारी आगलागीका कारण मृत्यु भएकामध्ये भिसेउका १६ जना, कोइम्बराका १० जना र कास्टोलो ब्रान्कोका एकजना रहेको जानकारी दिए।
देशको उत्तरी र मध्य क्षेत्रमा तापक्रम बढेर ३२ डिग्री सेल्सियस पुगेको छ।आगलागीमा परी घाइते भएका ५१ जनामध्ये ६ जनाको अवस्था गम्भीर रहेको अधिकारीहरूले बताएका छन्।
आगलागी भएपछि भागदौड गर्दा भएको दुर्घटनामा परी अधिकांश घाइते भएका हुन्। अधिकांश मोटरबाटो र रेल मार्गहरू बन्द भएका छन् भने गाउँहरू पूरै खाली गराइएका छन्।
पेनाकोवा निवासीले चारैतर्फ आगोले घेर्दा जीवन नर्कमय बनेको बताए। आगलागी नियन्त्रण गर्न ६ हजार अग्निनियन्त्रकहरू परिचालित भइरहेका छन्। यसैगरी स्पेनको जंगलमा डढेलो लाग्दा ३ जनाको मृत्यु भएको छ।
प्रतिक्रिया दिनुहोस !
