नेमारसँगको मतभेदका कारण काभानीले पीएसजी छाड्ने
पेरिस : बार्सिलोनाका पूर्वस्टार नेमार कीर्तिमानी रकमा पेरिस सेन्ट जर्मन (पीएसजी) मा आबद्ध भएपछि पीएसजीका अन्य खेलाडीमा भने तिक्तता छाउन सुरु भएको छ । पीएसजीका स्टार एडिन्सन काभानीले टोलीको प्रदर्शन र आफ्नो भूमिकाका विषयमा असन्तुष्टि व्यक्त गरेका छन् । नेमारका कारण काभानी पीएसजी छाडेर म्यान सिटी जाने विषय अहिले अन्तर्राष्ट्रिय सञ्चारमाध्यमका लागि ठूला समाचार बनिरहेका छन् ।
काभानीलाई आबद्ध गर्न म्यान सिटीका प्रशिक्षक पेप ग्वार्डिओलाले पनि चासो देखाएको चर्चा छ । काभानी पीएसजी छाडेर म्यान सिटीमा जान लागेका समाचार स्पेनिस समाचारपत्र ‘डोन बलोन’ ले प्राथमिकताका साथ प्रकाशित गरेको छ ।
यसअघि पीएसजीमा फ्रिकिक र पेनाल्टी सुटका लागि कहलिएका काभानीले नेमारको आगमनसँगै सबै विषयमा छायामा परेको अनुभव गर्न थालेका छन् । ‘क्लबका अफिसियलले समेत मलाई त्यति ध्यान नदिएको अनुभूति भएको छ । नेमारका कारण नै म खेलमा जम्न सकिरहेको छैन । आफ्नो प्रतिभा देखाउन पनि मैले अर्को गन्तव्य रोज्नु आवश्यक छ । त्यो गन्तव्य म्यान सिटी हुन सक्छ’, ३० वर्षीय काभानीले भनेका छन् । जारी लिगको सुरुदेखि नै हरेक खेलमा काभानी र नेमारबीच फ्रिकिक र पेनाल्टी प्रहार गर्ने विषयमा खटपट हुँदै आएको छ । यी दुवै स्टारले आफूलाई केन्द्रमा राख्दा क्लबका पदाधकारीले समेत नेमारलाई बढी च्यापेको काभानीको ठम्याइँ छ ।
नापोलीका पूर्वस्ट्राइकर काभानीले जुनसुबै बेला पीएसजी छाड्न सक्ने समाचारमा उल्लेख छ । दुई स्टारबीच आपसी तालमेल नमिल्दा क्लबका पदाधिकारीसमेत चिन्तित बनेका छन् । काभानीमाथि म्यान सिटीमात्र नभई स्पेनिस ला लिगा क्लब रियल म्याड्रिडले समेत आँखा लगाएको छ । रियलले आगामी जनवरीसम्म काभानीलाई क्लबमा आबद्ध गर्ने योजना बनाएको छ । तर काभानीले भने म्यान सिटी नै आफ्नो पहिलो रोजाइमा परेको बताउँदै आएका छन् ।
पीएसजीले अहिले नेमारलाई दायाँ र काभानीलाई बायाँ साइडबाट खेलाउँदै आएको छ । जारी लिगका पछिल्ला दुई खेलमा पीएसजीका लागि काभानी र नेमारले पाँच÷पाँच गोल गरेका छन् । पीएसजीका मिडफिल्डर मारक्विनोले टोलीमा दुई खेलाडीबीच प्रतिस्पर्धा हुनु स्वाभाविक भएको बताए । उनले ईएसपीएनसँगको कुराकानीमा भनेका छन्, ‘काभानी र नेमारको द्वन्द्व स्वाभाविक हो ।
मैदानमा जसलाई पनि म राम्रो खेलौं भन्ने हुन्छ । टोलीका प्रशिक्षकले दुवै खेलाडीलाई समान मौका दिएका छन् । आवश्यकताअनुसार खेलाडीको भूमिका फरक हुने हो ।’ काभानी र नेमार दुवै बेलोन डी ओर अवार्डको मनोनयनमा समेत परेका छन् ।