१७ वर्षदेखि निर्मानाधीन अवस्थामै क्रिक्रेट मैदान
दाङ : अन्तराष्ट्रिय स्तरको क्रिक्रेट मैदान बनाउने उदेश्यले निर्माण सुरु गरिएको दाङको लमहीमा रहेको लमही क्रिकेट मैदान निर्माण सुरु गरिएको १७ वर्ष सम्म पनि अधुरै रहेका छ । लमही नगर विकास समितिले निर्माण थालेको क्रिकेट मैदानले १७ वर्ष सम्ममा पनि पूर्णता पाउन नसकेको हो ।
आर्थिक वर्ष २०५७/०५८ देखि सुरु भएको निर्माणको काम हाल सम्म आउदा २ करोड ८३ लाख रुपैया खर्च भइसकेको नगर विकास समितिले जनाएको छ । खेलकुल मन्त्रालयले २० लाख रुपैया मात्रै लगानी गरेको छ । ३५ हजार दर्शक अट्न सक्ने ५ विगाह क्षेत्रफलभित्र फैलिएको मैदान पश्चिम नेपालकै ठूलो खेल मैदान भएको दावी गरिदै आएको छ । लमही नगर विकास समितिका सव ईन्जिनियर तुलसीराम अर्यालले निमार्ण सुरु भएको १७ वर्ष सम्ममा पनि निर्माण पुरा नभएको बताए । उनले नगर विकासको तर्फबाट डिपीआर गरि सकेको र हालसम्म २ करोड ८३ लाख रुपैया खर्च भएको बताए ।
यसमध्ये चालु आर्थिक वर्षमा १ करोड ३१ लाख खर्च हुने क्रममा रहेको छ । १७ वर्ष सम्ममा पनि क्रिकेट मैदान निर्माण नहुँदा खेलाडीहरुलाई भने खेलमा समस्या हुँदै आएको छ । हालसम्म फिल्ड ग्रेडिङ, नाला, तारजाली निर्माण, कम्पाउण्डवाल निर्माण र डिपीआर तयार गर्ने काम भएको छ । भौतिक पुर्वाधारमा विकास समितिले लागतका हिसावले निर्माण गर्न नसक्ने भएपछि खेल्न सहज गराउन फिल्ड रेडिङ र ग्रेडिङ गराएर खेल्ल लायक बनाएको अर्यालले बताए ।
चालु आर्थिक वर्ष २०७४/०७५ मा नगर विकास समितिले क्रिक्रेट मैदानमा अन्डरग्राउण्ड पक्की नाली निर्माण र प्याराफिट निर्माणका लागि एक करोड ३१ लाख रुपैयाँ बजेट विनियोजन गरेको नगरविकास समितिका सव ईञ्जिनियर अर्यालले जानकारी दिए । ‘क्रिक्रेट मैदानमा खेल सञ्चालन गर्न अब ग्राउण्ड पिच, खेलमा आवश्यक भौतिक पुर्वाधार र नाला निर्माण गर्न आवश्यक रहेको बताए । ‘नगरविकास समितिले आफ्नो लगानीमा मैदानको निर्माण कार्यमा सहयोग गरीरहेको छ, हाल सम्म जिल्ला खेलकुद विकास समितिवाट जम्मा २० लाख लगानी भएको छ' उनले भने । पूर्ण रुपमा मापदण्ड अनुसारको मैदान निर्माण गर्न २२ करोड लाग्ने देखिएको छ ।
सब ईन्जिनियर अर्यालले नगर विकास समितिले मात्रै त्यो काम पूरा गर्न नसक्ने भएकाले राज्यले ध्यान दिनु पर्ने बताए । उनले राज्यले ध्यान देओस् भनेर विभागीय मन्त्रीदेखि खेलकुद विकास समिति, जिल्ला विकास, क्रिकेटसँग सबैमा आग्रह गरको र निरीक्षण समेत गराउदै आएको तर पनि सुनुवाई नभएको जानकारी दिए । राज्यले निर्माणमा चासो र ध्यान नदिँदा १७ वर्षदेखि निर्मानाधीन अवस्थामा रहेको र पूरा नभएको सरोकारवालाहरुले बताएका छन् ।
लमही क्रिकेट मैदानलाई राष्ट्रिय गौरवको आयोजनाकोरुपमा अघि बढाउनुपर्ने र त्यसको पहल स्थानीय सरकारले गर्नुपर्ने उनीहरुको भनाई छ । अन्तराष्ट्रिय स्तरको लमही क्रिक्रेट मैदानलाई राष्ट्रिय गौरवको योजनाको रुपमा लैजानुपर्ने र गुरुयोजना अनुसार भौतिक पूर्वाधार निर्माण गरी राष्ट्रियस्तरको खेल आयोजना गर्नुपर्ने जिल्लाका खेल प्रेमीहरुको माग छ ।
दाङ क्रिकेट संघका अध्यक्ष प्रदीप मजगैयाले क्रिकेट मैदान निर्माणमा राज्यले ध्यान दिनुपर्ने र गौरवको योजना घोषणा गरेर काम थाल्नु पर्ने बताए । लमही नगरपालिकाका प्रमुख कुल बहादुर केसीले क्रिक्रेट मैदानको संरक्षण र निर्माणमा नगरपालिकाले ध्यान दिने बताए । केसीले लमहीको क्रिक्रेट मैदान दाङ जिल्ला सहित सिंगो राष्ट्रको गौरव भएको भन्दै मैदानको निर्माण कार्यलाई पूर्णता दिन लगानीकर्ताको खोजी गर्ने बताए ।
तत्कालका लागि क्रिक्रेट खेलको प्रशिक्षकको व्यवस्था गर्ने, निकट भविस्यमा हुन गइरहेको मध्यपश्चिम स्तरीय महिला क्रिक्रेट प्रतियोगिता लमहीको मैदानमा राख्नको लागि भूमिका खेल्ने समेत बताए । ‘लमहीको समग्र विकासमा क्रिक्रेट मैदानको भूमिका महत्वपूर्ण छ,यसलाई पूर्णता दिन म लाग्छु' उनले भने ।
क्रिक्रेट मैदान निर्माण १७ वर्ष सम्म भएको लगानी
आर्थिक वर्ष लगानी
२०५७/०५८ ३० लाख
०५८/०५९ १८ लाख
०६४/०६५ २६ लाख
०७३/०७४ ५८ लाख
०७४/०७५ १ करोड ३१ लाख
०६४/०६५ २० लाख (खेलकुद विकास समितिबाट)
जम्मा रकम २ करोड ८३ लाख