स्वारेजले दुर्इ मैत्रीपूर्ण खेल गुमाउने
मोन्टेभिडियो : उरुग्वेका स्टार स्ट्रइकर लुइस स्वारेज केही समय मैदानमा देखा नपर्ने भएका छन् । पछिल्लो समय घुँडाको चोटका कारण स्पेनिस क्लब बार्सिलोनाको बेन्चमा बस्दै आएका स्वारेजले पोल्यान्ड र अस्ट्रियाविरुद्धको मैत्रीपूर्ण खेल पनि गुमाउने भएका छन् । ३० वर्षीय स्वारेज गत अगस्टमा चिरप्रतिद्वन्द्वी रियल म्याड्रिडविरुद्धको स्पेनिस सुपर कपका क्रममा घाइते भएका थिए ।
खुट्टामा गम्भीर चोट बोकेका स्वारेज अहिले पनि स्वास्थ्यलाभ गरिरहेका छन् । त्यसयता उनले विश्वकप छनोटअन्तर्गत अर्जेन्टिना र पाराग्वेविरुद्धको खेल भने खेलेका थिए । क्लब फुटबलमा भने उनी अधिकांश समय बेन्चमै बस्दै आएका छन् । अगस्टयता उनले जम्मा आठ खेलमात्र खेलेका छन् । शारीरिक रूपमा फिट नभएकै कारण स्वारेजले नोभेम्बर १० तारिखमा हुने पोल्यान्ड र १४ तारिखमा हुने अस्ट्रियाविरुद्धको खेल गुमाउने छन् ।
अघिल्लो वर्ष रूसमा आयोजना हुने विश्वकप फुटबल प्रतियोगितामा स्थान बनाउन सफल भएपछि उरुग्वेले पहिलोपटक मैत्रीपूर्ण खेल्न लागेको हो । उरुग्वे फुटबल संघका अनुसार बार्सिलोनाको चिकित्सका विभागले स्वारेजलाई थप उपचारको आवश्यकता रहेको बताएको छ । बार्सिलोनाका प्रशिक्षक अर्नेस्टो भाल्र्भडेले भने स्वारेजको समस्या गम्भीर नरहेको बताएका छन् ।
प्रतिक्रिया दिनुहोस !
