सुरु भएको १७ वर्षमा पनि बनेन क्रिक्रेट मैदान
![सुरु भएको १७ वर्षमा पनि बनेन क्रिक्रेट मैदान](https://annapurnapost.prixacdn.net/media/albums/Dang-Rajbir-Sing-1-59ed69f4e247e6.11851317_yYyhGm6Cty.jpg)
तुलसीपुर : दाङको लमहीमा सुरु गरिएको लमही क्रिकेट मैदानको निर्माण कार्य १७ वर्षसम्म पनि पूरा हुन सकेको छैन । अन्तर्राष्ट्रिय स्तरको क्रिकेट मैदान बनाउने उद्देश्यसहित लमही नगर विकास समितिले निर्माण थालेको क्रिकेट मैदानले १७ वर्षसम्ममा पनि पूर्णता पाउन नसकेको हो । आर्थिक वर्ष २०५७÷०५८ देखि सुरु भएको क्रिकेट मैदान निर्माणमा हालसम्म दुई करोड ८३ लाख रुपैयाँ खर्च भइसकेको छ ।
नगर विकास समितिका अनुसार युवा तथा खेलकुद मन्त्रालयले मात्रै २० लाख रुपैयाँ लगानी गरेको छ । ३५ हजार दर्शक क्षमताको क्रिकेट मैदान पाँच बिघा क्षेत्रफलमा फैलिएको छ । यो मैदान पश्चिम नेपालकै ठूलो खेलमैदान भएको दाबी गरिँदै आएको छ । लमही नगर विकास समितिका सबइन्जिनियर तुलसीराम अर्यालले निर्माण सुरु भएको १७ वर्षसम्ममा पनि निर्माणको काम पूरा नभएको बताए । उनले नगर विकासका तर्फबाट डीपीआर गरिसकिएको र हालसम्म दुई करोड ८३ लाख रुपैयाँ खर्च भएको जानकारी दिए ।
क्रिकेट मैदानमा चालू आर्थिक वर्षमा एक करोड ३१ लाख रुपैयाँको काम भइरहेको छ । हालसम्म फिल्ड ग्रेडिङ, नाला, तारजाली निर्माण, कम्पाउन्डवाल निर्माण र मैदानको डीपीआर तयार गर्ने काम भएको छ । विकास समितिले मात्रै लागत बेहोर्न नसक्ने भएपछि मैदानले पूर्णता पाउन नसकेको र खेल्न सहजताका लागि फिल्ड रेडिङ र ग्रेडिङ गरिएको अर्यालले बताए ।
चालू आर्थिक वर्षमा नगर विकास समितिले क्रिकेट मैदानमा अन्डरग्राउन्ड पक्की नाली निर्माण र प्याराफिट निर्माणका लागि एक करोड ३१ लाख रुपैयाँ बजेट विनियोजन गरेको सबइन्जिनियर अर्यालले जानकारी दिए । ‘क्रिक्रेट मैदानमा खेल सञ्चालन गर्न अब ग्राउन्ड पिच, खेलमा आवश्यक भौतिक पूर्वाधार र नाला निर्माण गर्न आवश्यक रहेको छ’, उनले भने, ‘नगर विकास समितिले आफ्नो लगानीमा मैदानको निर्माणमा सहयोग गरिरहेको छ । हालसम्म जिल्ला खेलकुद विकास समितिबाट जम्मा २० लाख लगानी भएको छ ।’ पूर्ण रूपमा मापदण्डअनुसारको मैदान निर्माण गर्न २२ करोड रुपैयाँ लाग्ने अनुमान गरिएको उनले बताए ।
अर्यालले नगर विकास समितिले मात्रै क्रिकेट मैदान पूरा गर्न नसक्ने भएकाले राज्यले पनि ध्यान दिनुपर्नेमा बताए । उनले विभागीय मन्त्रीदेखि खेलकुद विकास समिति, जिल्ला विकास समिति र खेलकुद र क्रिकेटसँग सम्बन्धित सबै निकायसँग आग्रह गरिएको जानकारी दिँदै कतैबाट सुनुवाइ नभएको बताए । राज्यले निर्माणमा चासो नदिँदा १७ वर्षदेखि क्रिकेट मैदान निर्माणाधीन अवस्थामै रहेकोमा आक्रोश स्थानीय सरोकारवालाले पोखे ।
लमही क्रिकेट मैदानलाई राष्ट्रिय गौरवको आयोजनाको रूपमा अघि बढाउनुपर्ने र त्यसको पहल स्थानीय सरकारले गर्नुपर्ने माग उनीहरूले गरे । अन्तर्राष्ट्रिय स्तरको लमही क्रिक्रेट मैदानलाई राष्ट्रिय गौरवको योजनाको रूपमा लैजानुपर्ने र गुरुयोजनाअनुसार भौतिक पूर्वाधार निर्माण गरी राष्ट्रियस्तरको खेल आयोजना गर्नुपर्ने जिल्लाका खेलप्रेमीको माग छ । दाङ क्रिकेट संघका अध्यक्ष प्रदीप मजगैयाँले क्रिकेट मैदान निर्माणमा राज्यले ध्यान दिनुपर्ने र राष्ट्रिय गौरवको योजना घोषणा गरेर काम थाल्नुपर्ने बताए ।
लमही नगरपालिकाका प्रमुख कुलबहादुर केसीले क्रिक्रेट मैदानको संरक्षण र निर्माणमा नगरपालिकाले चासो दिने बताए । केसीले लमहीको क्रिक्रेट मैदान दाङ जिल्लासहित सिंगो राष्ट्रको गौरव भएको भन्दै मैदानको निर्माण कार्यलाई पूर्णता दिन लगानीकर्ताको खोजी गर्ने बताए । उनले तत्कालका लागि प्रशिक्षकको व्यवस्था गर्ने, मध्यपश्चिमस्तरीय महिला क्रिकेट प्रतियोगिता लमहीको मैदानमै आयोजना गर्नका लागि आफूले भूमिका खेल्ने प्रतिबद्धता जनाए । ‘लमहीको समग्र विकासमा क्रिक्रेट मैदानको भूमिका महत्वपूर्ण छ, यसलाई पूर्णता दिन म निरन्तर लाग्नेछु’, उनले भने ।
१७ वर्षदेखि भएको लगानी
आर्थिक वर्ष लगानी
२०५७÷०५८ ३० लाख
२०५८÷०५९ १८ लाख
२०६४÷०६५ २६ लाख
२०७३÷०७४ ५८ लाख
२०७४÷०७५ १ करोड ३१ लाख
२०६४÷०६५ २० लाख (खेलकुद विकास समितिबाट)
जम्मा रकम २ करोड ८३ लाख
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)