काठमाडौं : पोर्चुगल र स्पेनिस क्लब रियल मड्रिडका स्टार फुटबलर क्रिस्टियानो रोनाल्डो फिफाको पुरुषतर्फ उत्कृष्ट वर्ष खेलाडी घोषित भएका छन् । उनी अर्जेन्टिनाका स्टार लियोनल मेसी र ब्राजिलका स्टार नेइमारलाई पछि पार्दै उत्कृष्ट वर्ष खेलाडी बन्न सफल भएका हुन् । सोमबार राति लण्डनमा आयोजित कार्याक्रममा उनले लगातार दोस्रो वर्ष फिफाको पुरुष तर्फको उत्कृष्ट वर्ष खेलाडीको अवार्ड हात पारे ।
२०१७ मा उनले आफ्नो टोली रियल मड्रिडलाई युरोपियन च्याम्पियन लिगको उपाधी, स्पेनिस ला लिगाको उपाधी दिलाउन महत्वपूर्ण भूमिका खेलेका थिए भने पोर्चुगललाई युरोकपको उपाधि दिलाउन भूमिका खेलेका थिए । उनले २०१७ मा हालसम्म क्लब र राष्ट्रका लागि गरी ४४ गोल गरेका छन् ।
उत्कृष्ट प्रशिक्षको उपाधि पनि रियल मड्रिडकै जिनेदिने जिदानले पाएका छन् । महिला तर्फको उत्कृष्ट खेलाडीको अवार्ड भने बार्सिलोनाकी लिके मार्टेन्सले प्राप्त गरिन ।
उपाधि ग्रहण गर्दै रोनाल्डोले आफूलाई भोट गर्ने संसारभरका समर्थकलाई धन्यवाद दिए । मेसी र नेइमारलाई पनि सम्बोधन गर्दै लगातार दोस्रो पटक फिफाको उत्कृष्ट वर्ष खेलाडीको उपाधि पाउनु आफ्ना लागि अत्यन्तै खुसीको क्षण भएको बताए । रियल मड्रिडका समर्थक, टिमका अन्य साथी, प्रशिक्षक, रियल मड्रिडका अध्यक्ष सबैलाई धन्यवाद दिए ।
प्रतिक्रिया दिनुहोस !
