काठमाडौं : एभरेस्ट प्रिमियर लिग (ईपीएल) क्रिकेटको दोस्रो संस्करणका लागि सोमबार भएको खेलाडी लिलामी (अक्सन)मा राष्ट्रिय टोलीका चारजना खेलाडी आरिफ सेख, करण केसी, सन्दीप लामिछाने र विनोद भण्डारीका लागि सर्वाधिक बोली लागेको छ । यी चारैजना खेलाडी जनही एक लाख ७५ हजार रुपैयाँमा बिकेका छन् ।प्रतियोगितामा सहभागी ६ मध्ये पाँचवटा टोलीले यी चारैजना खेलाडीका लागि तोकिएको अधिकतम रकम (एक लाख ७५ हजार रुपैयाँ) तिर्न तयार भएपछि त्यसको टुंगो गोला प्रथाबाट लगाइएको थियो ।
दायाँहाते ब्याटिङ अलराउन्डर आरिफलाई भैरहवा ग्लाडिएटर्सले किनेको छ । यसैगरी दायाँहाते मध्यम गतिका बलर करणलाई भैरहवा वारियर्स, दायाँहाते लेग स्पिनर सन्दीपलाई ललितपुर प्याट्रियट्स र विकेटकिपर ब्याट्सम्यान विनोदलाई पोखरा राइनोजले किनेको छ । ईपीएल दोस्रो संस्करणमा मार्की प्लेयर र विदेशी खेलाडीबाहेक यी चारजना सर्वाधिक रकम पाउने खेलाडी बनेका छन् ।
आयोजकले मार्की प्लेयरका लागि टोलीहरूले आपसी समझदारीमा तलब निर्धारण गर्नसक्ने जनाएको छ भने विदेशी खेलाडीको रकम पनि तय हुन बाँकी छ । घरेलु खेलाडीको अक्सन सोमबार सकिँदा आयोजकले विदेशी खेलाडी पनि चाँडै सार्वजनिक गरिने जनाएको छ । आयोजकले सहभागी सबै टोलीका लागि तीनजना विदेशी खेलाडी अनिवार्य गरेको छ ।
नाम दर्ता गराएका एक सय ६० जना खेलाडीलाई सोमबार अक्सनमा राखिएको आयोजकले जनाएको छ । आयोजकले टोलीहरूलाई अक्सनमा क्याटेगोरी ‘ए’ बाट कम्तीमा एक र बढीमा चार तथा क्याटेगोरी ‘बी’बाट कम्तीमा चार र बढीमा ६ जना खेलाडीसम्म किन्न पाउने नियम राखेको थियो । ‘सी’ क्याटेगोरीका खेलाडीलाई भने ‘फिलर’का रूपमा प्रयोग गरिएको जनाइएको छ ।
खेलाडी किन्नका लागि १० लाख रुपैयाँसम्म मात्र खर्च गर्न पाउने व्यवस्था गरिएको उक्त अक्सनमा ‘ए’ क्याटेगोरीका लागि प्रतिखेलाडी कम्तीमा एक लाख २५ हजार र बढीमा एक लाख ७५ हजार, ‘बी’ क्याटेगोरीका खेलाडीका लागि कम्तीमा ७५ हजार र बढीमा एक लाख २५ हजार तथा ‘सी’ क्याटेगोरीका खेलाडीका लागि कम्तीमा ५० हजार र बढीमा ७५ हजार रुपैयाँ दिनुपर्ने व्यवस्था गरिएको थियो ।
‘बी’ क्याटेगोरीका खेलाडीमध्ये पनि आठजना खेलाडीका लागि एकभन्दा बढी टोलीले तोकिएको मध्ये सर्वाधिक रकम तिर्न तयार भएपछि गोला प्रथामार्फत निर्णय लिइएको थियो । भैरहवा ग्लाडिएटर्सले कृष्ण कार्की र भुवन कार्कीलाई जनही एक लाख २५ रुपैयाँ तिर्ने गरी गोल प्रथामार्फत आफ्नो टोलीमा भित्र्याउन सफल भएको छ । यसैगरी आसिफ सेखलाई विराटनगर वारियर्स, सहाब आलमलाई चितवन टाइगर्स, सुशील कँडेललाई काठमाडौं किङ्स इलाभेन, कुशल भुर्तेल र पवन सर्राफलाई ललितपुर प्याट्रियट्स तथा सौरभ खनाललाई पोखरा राइनोजले गोला प्रथामा आफ्नो टोलीमा पारेका छन्।
यसैगरी ‘सी’ क्याटेगोरीका खेलाडीमध्ये अलराउन्डर अमरसिंह रौटेलाका लागि सर्वाधिक बोली लागेको छ । रौटेलालाई काठमाडौं किङ्स इलाभेनले ७५ हजार तिरेर गोला प्रथामार्फत आफ्नो टोलीमा पारेको छ । अक्सनमा रहेकामध्ये ६० जना खेलाडी बिकेका छन् । टोलीहरूले आफूलाई आवश्यक परे तथा अनुबन्धित खेलाडी घाइते वा अन्य कारणले उपलब्ध नभएको अवस्थामा अक्सनमा परेर पनि नबिकेका खेलाडीलाई अनुबन्ध गर्नसक्ने आयोजकले जनाएको छ ।
प्रतिक्रिया दिनुहोस !
