एन्फाको बैठकले विशेष साधारणसभाको निर्णय उल्ट्यायो

काठमाडौं : विशेष साधारणसभाले गरेको निर्णय उल्ट्याउँदै अखिल नेपाल फुटबल संघ (एन्फा)को कार्यसमिति बैठकले आफ्नो निर्वाचन साधारणसभा झन्डै एक महिना पछि सारेको छ । एन्फाको सोमबार बसेको कार्यसमिति बैठकले पदाधिकारीकै विरोधका बीच निर्वाचन साधारणसभा सार्ने निर्णय गरेको हो, जुन व्यावहारिक र एन्फाको विधानको समेत विरुद्धमा छ ।

एन्फाले आफ्नो चुनावी साधारणसभाको मिति निर्धारण गर्नका लागि गत २३ असोजमा बोलाएको विशेष साधारणसभाले आगामी २३ पुस (जनवरी ७) मा नयाँ कार्यसमिति चयन गर्ने निर्णय गरेको थियो । तर, त्यसको महिना दिन पनि नबित्दै एन्फा कार्यसमिति बैठकले फिफा र एएफसीको प्रतिनिधिको उपस्थितिमा भएको विशेष साधारणसभाको निर्णयलाई समेत उल्ट्याएर आगामी माघ ११ गते चुनावी साधारणसभा गर्ने निर्णय गरेको हो । कार्यसमिति बैठकले प्रदेश र प्रतिनिधिसभाका लागि हुन लागेको आसन्न निर्वाचनका कारण आफ्नो निर्वाचन सार्नु परेको जनाएको छ । कार्यसमितिको सो निर्णयप्रति एन्फाका उपाध्यक्ष किशोर राईले असहमति जनाउँदै नोट अफ डिसेन्ट लेखेका छन् ।

‘प्रतिनिधिसभा र प्रदेशसभाको निर्वाचनले हाम्रो निर्वाचनमा कुनै असर पर्दैन । त्योभन्दा महत्वपूर्ण कुरा फिफा र एएफसीको समेत प्रतिनिधि उपस्थितिमा बसेको विशेष साधारणसभाले गरेको निर्णय कार्यसमितिले उल्ट्याउन मिल्दैन’, उपाध्यक्ष राईले भने, ‘हामीले निर्वाचन सार्न हुन्न भन्दा पनि साथीहरूले एकलौटी निर्णय गर्नुभयो । त्यसैले मैले नोट अफ डिसेन्ट लेखेको हुँ ।’ राईले मिति सारेर निर्वाचन नै नगराउने खेल सुरु भएको समेत बताए ।

कार्यसमिति बैठकले सुमन केसीको संयोजकत्वमा पाँच सदस्यीय निर्वाचन समिति र मोतीराम गौतमको संयोजकत्वमा पाँच सदस्यीय अपिल कमिटीसमेत गठन गर्ने निर्णय गरेको छ । उपाध्यक्ष राईले निर्वाचन समिति र अपिल कमिटीसमेत एलौटी ढंगले गठन गरेको आरोप लगाए ।

साथै बैठकले आगामी वर्ष आयोजना हुने एएफसी क्लब च्याम्पियनसिपमा नेपालका तर्फबाट थ्रीस्टार क्लबलाई सहभागी गराउने निर्णय पनि गरेको छ । ‘नेपालमा लिग नभएको अवस्थामा यसअघिको विजेताको हैसियतमा थ्रीस्टारलाई सहभागी गराउने निर्णय गरेका हौं । एएफसीले सहभागिताका लागि एन्फामा पत्र पठाएको थियो । हामीले नेपालको अवस्थाबारे जानकारी गरायौं । त्यसपछि एएफसीकै सुझावका आधारमा थ्रीस्टारको नाम पठाउने निर्णय गरेका हौं’, एन्फाका प्रमुख कार्यकारी अधिकृत इन्द्रमान तुलाधरले भने ।

एएफसी क्लब च्याम्पियनसिपमा थ्रीस्टारलाई दिइएको सहभागिताको अवसरलाई क्षतिपूर्तिको रूपमा पनि हेरिएको छ । गत वर्ष एएफसी कप प्ले अफका लागि छनोट भएको थ्रीस्टार एन्फाकै पदाधिकारीका कारणले उक्त प्रतियोगिता खेल्नबाट वञ्चित भएको थियो । त्यसबापत एन्फाले हालैमात्र थ्रीस्टारलाई एक करोड ५० लाख रुपैयाँ क्षतिपूर्तिसहित तीनवटा अन्तर्राष्ट्रिय प्रतियोगितामा सहभागी गराउने सहमति भएको थियो ।