सचिव सरुवामा मनपरी, रातारात सच्चियो सरुवाको निर्णय
काठमाडौं : सरकारले सचिव सरुवाको निर्णय रातारात सच्याएर मनपरी गरेको छ । अघिल्लो दिन एक निकाय वा मन्त्रालयमा सरुवा भएका सचिव भोलिपल्ट अर्को मन्त्रालयमा परेका छन् । सरकारले केही सचिवलाई रातारात मनलागी सरुवा गरेको छ भने केहीलाई थमौतीमा पारेको हो ।
सोमबार बसेको मन्त्रिपरिषद् बैठकले सचिव सरुवाको निर्णय गरेको थियो । सचिवहरूको सरुवा मनपरी गरी रातारात सच्याएर प्रशासनिक क्षेत्रमाथि चरम हस्तक्षेप गरेको आरोप प्रशासकले लगाएका छन् ।
प्रधानमन्त्री तथा मन्त्रिपरिषद् कार्यालयका सचिव ङइन्द्रप्रसाद उपाध्यायको सरुवा सोमबार लोकसेवा आयोगमा भएको थियो । मंगलबार भने उनको सरुवा महिला, बालबालिका तथा समाजकल्याण मन्त्रालयमा भएको छ भने आयोग सचिवविहीन बन्न पुगेको छ । आयोगको नेतृत्वले उपाध्यायलाई अस्वीकार गरेपछि सरकारले उनलाई ‘ब्याक’ गरेको स्रोतले जनाएको छ । आयोगका अध्यक्ष उमेश मैनालीले सचिव पठाउनुअघि आफ्नो राय नलिएको भन्दै मुख्यसचिव राजेन्द्रकिशोर क्षेत्रीस“ग टेलिफोनमार्फत असन्तुष्टि जनाएका थिए ।
उपाध्यायलाई महिला मन्त्रालयमा पठाएपछि त्यहाँका सचिव प्रेमकुमार राईको सरुवा प्रधानमन्त्री कार्यालयमा भएको छ । सचिव राईको डेढ महिनाअघि मात्र आपूर्ति मन्त्रालयबाट महिला, बालबालिका तथा समाजकल्याणमा पुगेका थिए ।
क्षेत्रीय प्रशासन कार्यालय हेटौंडाका सचिव रेश्मीराज पाण्डे सबैभन्दा बढी प्रभावित भएका छन् । पाण्डेको सरुवा सोमबार सामान्य प्रशासन मन्त्रालयमा भएको थियो । धेरै साथीभाइले पाण्डेलाई सोमबार बधाई तथा शुभकामना पनि दिए तर मंगलबार उनको सरुवा क्षेत्रीय प्रशासन कार्यालय हेटौंडामैै थमौती हुन पुगेको छ । उनलाई त्यहीं राखेर सरकारले सामान्य प्रशासनमा उद्योग मन्त्रालयका सचिव शंकरप्रसाद कोइरालालाई लगेको छ । उद्योग मन्त्रालयमा भने मंगलबार नै सूचना आयोगकी सचिव यमकुमारी खतिवडाको सरुवा भएको छ ।
यसैगरी, सरकारले सूचना तथा सञ्चार मन्त्रालयका सचिव महेन्द्रमान गुरुङलाई प्रधानमन्त्री कार्यालयमा सरुवा गरेको छ । सञ्चार मन्त्रालयमा भने प्रधानमन्त्री कार्यालयका सचिव केदारबहादुर अधिकारीको सरुवा भएको छ । प्रधानमन्त्री कार्यालयकै सचिव रामकुमार आचार्यलाई सरकारले महालेखा नियन्त्रक कार्यालयमा पुर्याएको छ ।
सोमबार सचिवमा बढुवा भएका प्राविधिकतर्फका विष्णुओम वादेको पदस्थापन राष्ट्रिय सतर्कता केन्द्रमा भएको छ । सरकारले तराई-मधेस बाढी व्यवस्थापन आयोजना प्रमुखमा राज्यमन्त्रीसरह सुविधा पाउने गरी डा. सुमन कर्णलाई नियुक्त गरेको छ ।
प्रतिक्रिया दिनुहोस !
