प्रियंकाको पछि लाग्न नायिकाको होडबाजी
चलचित्र ‘कोहलपुर एक्सप्रेस’को घोषणा कार्यक्रममा अभिनेत्री प्रियंका कार्कीले भनिन्, ‘जुनकिरी आर्टस्को ब्यानरमा बनेको पहिलो चलचित्रमा मलाई विश्वास गरेकोमा खुसी लागेको छ । यो यात्रा सफल रहोस् ।’ सहयात्री साथी केकी अधिकारी निर्मात्री रहेको चलचित्रमा अनुबन्धित भएकी प्रियंकाको आसय थियो, अभिनेत्रीले नै निर्माण गरेको चलचित्रमा काम गर्नु अझ रमाइलो हुन्छ ।
हुन त अहिले केकीमात्रै होइन अधिकारी निर्माता निर्देशकको रोजाइमा पर्छिन् प्रियंका । अहिले निःसन्देश नम्बर वान नायिकामा दह्रिएकी उनी अभिनीत चलचित्रले लोभलाग्दो व्यवसाय गरेको छ । धेरै चलचित्र सफलताको श्रेय उनले पाएकी छन् । उनलाई भ्याइनभ्याइ छ । अझै उनी ठूला बजेटका चलचित्रमा पहिलो रोजाइकी नायिका हुन् । प्रियंकालाई पछ्याउन अन्य समकालीन नायिकालाई धौ धौ नै छ । तर यो रफ्तार कहिलेसम्म रहन्छ भन्ने बहस चलचित्र क्षेत्रमा सुरु भइसकेको छ ।
उत्तिकै सम्भावना र प्रभावसहित पर्दामा प्रियंकालाई पछ्याइरहेका नायिकाहरूको रफ्तार बढ्दो छ । ग्ल्यामरस छविसहित पर्दामा उदार तनमनका साथ प्रस्तुत भइरहेका प्रियंका पछिका नायिकाहरूको बढ्दो क्रेजले अब उनको स्थान कसले लिने भन्ने होड सुरु भइसकेको छ ।
प्रियंकाले नायिका रेखा थापाको विरासत ओगटेकी हुन् । रेखाले एकछत्र राज गरिरहेका बेला प्रियंका उदाएकी थिइन् । रेखालाई उछिन्न प्रियंकालाई त्यति धेरै समय लागेन । रेखा र प्रियंकाको लय लगभग एउटै हो । दुवै विवाह अर्थात् रिलेसनपछि तर ग्ल्यामरस छविका साथ उद्योगमा स्थापित भएका हुन् । रेखाअघि निरुता सिंह चलचित्र उद्योगमा नम्बर वान नायिकाका रूपमा दह्रिएकी थिइन । तर निरुताको पहिचान पृथक् थियो । उनी रोनाधोना नायिकाका रूपमा चिनिन्थिन् ।
त्यसबेला चलचित्रको लहर पनि त्यस्तै थियो । दर्शकले नायिकाको पहिचान र छविमा परिवर्तन खोजिरहेका बेला रेखा ‘ग्ल्यामर क्रान्ति’ भनेर घोषित रूपमै चलचित्र उद्योगमा आएकी थिइन् । उनको त्यो सोच सफल पनि भयो । तर प्रियंकाको उदयपछि उनी क्रमशः रक्षात्मक अवस्थामा पुगेकी हुन् ।
अहिले प्रियंकापछि नम्बर वान नायिका को बन्ने भन्ने अघोषित होडबाजी सुरु भएको छ । यो दौडमा प्रियंकाका समकालीन र केहीपछि आएका नायिकाहरू पनि छन् । तर प्रियंकालाई उछिन्ने सम्भावना खासै देखिन्न । नम्रता श्रेष्ठ, निशा अधिकारी, ऋचा शर्मा, केकी अधिकारी, पूजा शर्मा, शिल्पा पोखरेल, वर्षा राउत पनि अहिले रुचाइएका नायिकामा पर्छन् । तर अब नम्बर वान नै बन्ने सम्भावना कमै छ । यही सूचीमा पर्छन् नीता ढुंगाना, बेनिशा हमाल, आशिश्मा नकर्मी, नम्रता सापकोटा, रीमा विश्वकर्मा, अनु शाह, वर्षा शिवाकोटी आदि ।
नम्बर वानको प्रतिस्पर्धामा साम्राज्ञी राज्यलक्ष्मी शाह अगाडि छिन् । भुवन केसी निर्देशित चलचित्र ड्रिम्सबाट रजतपट डेब्यु गरेकी २१ वर्षीया उनी सौन्दर्य प्रतियोगिता हुँदै चलचित्र क्षेत्रमा आएकी हुन् । चलचित्र ड्रिम्स, ए मेरो हजुर २ जस्ता उनी अभिनीत चलचित्रले राम्रो व्यापार गरेको छ । नयाँ पुस्तामा उनी सबैको रोजाइमा पर्ने नायिका हुन् ।
साम्राज्ञीकै हाराहारीको क्रेज छ अर्की २२ वर्षीया अभिनेत्री आना शर्माको पनि । चलचित्र जेरीबाट रजतपट डेब्यु गरेकी उनको दोस्रो चलचित्र ग्याङस्टार ब्लुजले सफल चलचित्रको सूचीमा नपरेपछि उनी अप्ठ्यारोमा परेकी छन् । तापनि अभिनय कला, सुन्दरता एवं उमेरका कारण उनी नम्बर वान नायिका बन्न सक्ने चलचित्रकर्मीको आकलन छ । चलचित्र जेरी प्रदर्शनपछि उनी भविष्यकी आसलाग्दी अभिनेत्रीका रूपमा चिनिएकी हुन् ।
चलचित्र ‘होस्टेल रिटन्र्स’पछि स्वस्तिमा खड्काले पनि चलचित्र क्षेत्रमा आशा जगाएकी हुन् । पछिल्लो चलचित्र दुई रुपैयाँसम्म आइपुग्दा दर्शकमाझ उनले पनि राम्रो छाप छाडिसकेकी छन् । अहिले नै नम्बर वानको दौडमा उनी नरहे पनि प्रभावशाली नायिकाका रूपमा आफूलाई उभ्याएकी छन् । प्रतिभावान् मानिए पनि अर्की नायिका माला लिम्बू खासै जम्न सकेकी छैनन् । सिंगापुरमा जन्मिएकी उनी चलचित्र ‘वन वे’बाट रजतपट डेब्यु गरेकी हुन् । पछिल्लो समय उनी चलचित्रभन्दा पनि म्युजिक भिडियो र आइटम डान्समा बढी देखिएकी छन् ।
नयाँ नायिकामा आँचल शर्मा निकै अगाडि छिन् । चलचित्र नाइँ नभन्नु ल ४ बाट चलचित्रमा डेब्यु गरेकी उनको दोस्रो चलचित्र जोनी जेन्टलमेन पनि दर्शकमाझ आइसकेको छ । चलचित्र लुट २ पछि एलिशा राई पनि चर्चामा छिन् । तर एलिशा लुट २ पछि ठूलो ब्यानरका चलचित्रमा दोहोरिएकी छैनन् । पछिल्लो समय निकै अपेक्षा गरिएकी नवनायिका हुन् दीपिका प्रसाईं । उनी अभिनीत चलचित्र ऐश्वर्य शुक्रबार नै रिलिज हुँदैछ । यदि यो चलचित्रले राम्रो व्यापार गर्न सक्यो भने अभिनयमा निःसन्देश उनको भाग्य चम्किनेछ ।
प्रतिक्रिया दिनुहोस !
