यौनिकता बुझ्न चाहन्छिन् जोलीपुत्री

चार वर्षको उमेरमै आफूलाई केटाको पहिरन लगाउन दिन अनुरोध गरिन् एन्जेलिना जोलीकी जेठी छोरी सिलोहले । भनिन्, ‘मम्मी मलाई मैले चाहेजस्तै लुगा लगाउन दिनुस् ।’ यति सानो उमेरमा उनले आफूलाई बालकका रूपमा चिनिन चाहनु अचम्मलाग्दो कुरा थियो । तैपनि उनका बुवा ब्राड पिट र मम्मी जोलीले सिलोहको भावनाको कदर गर्दै त्यसै गरे ।

अहिले ब्राड पिटसँग अलग रहेकी जोली केही दिनपहिला आफ्ना दुई छोरी ११ वर्षीया सिलोह र बाह्र वर्षीया जाहारासँग आफ्नो फिल्म ‘द ब्रेडविनर’को प्रिमियरमा देखा परिन् । प्रिमियरमा सिलोह टम ब्वाइका रूपमा देखा परेकी थिइन् भने जाहारा स्कर्टमा । ४२ वर्षीया जोलीकी जेठी छोरी सिलोहको उमेर बढ्दो छ । उमेरसँगै उनमा यौनिकताबारे अनेकन जिज्ञासा रहेको जोली बताउँछिन् ।

सन् २००८ मा ब्राड पिटको ओपरा विन्फ्रे सोमा छोरीले आफू जोन अथवा पिटर नामले चिनिन चाहेको बताएका थिए । जोलीले पनि भ्यानिटी फेयरमा छोरीले केटाको जस्तै गेटअप गर्न चाहेको स्वीकारिसकेकी छन् । छोरीको लैंगिक पहिचान के हो र उनमा के समस्या आएको हो भन्ने बुझ्न छोरीलाई लिएर अस्पताल पनि पुगेका थिए जोली र ब्राड । उमेर बढ्दै गएसँगै सिलोहको आकृति पुरुषको जस्तै देखिँदै गएको बताइएको छ । तर, उनका स्त्रीजन्य अंगहरू पनि बढ्दै गइरहेका छन्।

किशोरावस्थामा पुगेकी सिलोहका अंग नबढून् भन्ने उद्देश्यले हर्मोन नियन्त्रण गर्न अस्पताल पुगेका थिए उनीहरू । जोलीलेकी छोरी भने आफूलाई पूर्ण रूपमा जोन बनाउन चाहन्छिन् । ब्वाइज कट बनाउँछिन् । केटाको जस्तै पाइन्ट र सर्ट लगाउँछिन् । जोली र ब्राडले उनलाई जुनसुकै लिंगको भए पनि स्वीकार गर्ने बताएका छन् । जोली र ब्राडको सम्बन्ध अझै दोधारमा छ । ब्राड पुनः जोलीसँग मिल्न चाहेका छन् तर जोली आफ्ना बालबालिका र काममा मात्रै ध्यान दिइरहेकी छन् । उनले फेरि कुनै पनि सम्बन्ध बनाउन नचाहेको बताउँदै आएकी छन् । सन् २०१६ मा सम्बन्धविच्छेद गरेका भए पनि उनीहरू छोराछोरीका लागि सँगै काम गर्दैै आएका छन् ।