मंगोल सुन्दरीको बैंकर बन्ने सपना

बागलुङ सहारा खोलामा जन्मिएकी खुसी मगर १२ वर्षको उमेरमा परिवारका साथ काठमाडौं आइन् । नखीपोटमा बस्दै आएकी उनी एमबीए अध्ययनको तयारीमा छिन् । केही समय बैंक अफ काठमाडौंमा काम गरेपछि उनमा बैंकिङ क्षेत्रप्रति रुचि जागेको हो । परिवारमा सांगीतिक वातावरण छ । आफ्नै दाइको म्युजिक कम्पनी तारा म्युजिक प्रालिको निर्देशकका रूपमा समेत काम गरेकी खुसीले केही म्युजिक भिडियोमा मोडलिङ पनि गरेकी छन् । मिस मंगोल २०१७ मा भाग लिई फस्ट रनरअप बन्न सफल उनको लक्ष्य भने बैंकर बन्ने हो ।

सौन्दर्य प्रतियोगितामा भाग लिने सोच कसरी आयो ?

म बागलुङको दुर्गम गाउँ ताराखोलामा जन्मेकी हुँ । हाम्रो समाजमा महिलाले केही गर्न सक्दैन, त्यसैले बेलैमा विवाह गरेर पढाइदिनुपर्छ भन्ने मान्यता अझै छ । सहर गए छोरी बिग्रिन्छन् भन्ने ठान्छन् । यो सोचमा परिवर्तन ल्याई छोरीले पनि केही गर्न सक्छन् भनेर देखाउन मैले मिस मंगोल नेपाल २०१७ मा भाग लिएँ ।

फस्ट रनरअप बन्दाको अनुभव ?

म एकदमै खुसी र उत्साहित छु । उत्कृष्ट सातमा परेकालाई अन्तिम साझा प्रश्न सोधिएको थियो । प्रतिस्पर्धी साथीहरूको उत्तर पनि राम्रो थियो । सबैको उत्तर सुनिसकेपछि उत्कृष्ट तीनमा पर्छु भन्ने लागेको थियो । फस्ट रनरअप भएँ । सन्तुष्ट छु ।

प्रशिक्षणमा सिकेका कुराले तपाईंमा केही परिवर्तन ल्यायो ?

म नयाँ साथीसँग छिटै घुलमिल हुन सक्छु । विभिन्न स्थान, वर्ग, समुदाय र संस्कृतिबाट आएका साथीहरूलाई भेट्न पाउँदा यसै पनि धेरै कुरा सिक्न सकिन्छ । त्यसमाथि मिस मंगोलमा प्रशिक्षणका लागि कोर्स नै छ जसबाट व्यक्तित्व विकास, आत्मविश्वासमात्रै होइन करिअरका लागि पनि धेरै कुरा सिक्न सकिन्छ ।

प्रतियोगितापछि तपाईंमा आएको परिवर्तन ?

पहिलो कुरा त मेरो सानैदेखिको सपना पूरा भएको छ । गाउँबाट आएको एउटा सामान्य केटीले पनि केही गर्न सक्छ भन्ने प्रमाणित गरेकी छु । प्रतियोगिताअघि म आफन्त र साथीभाइमै सीमित थिएँ । तर अहिले मलाई चिन्ने धेरै छन् । फ्यान बढेका छन् । मेरो आवाज पनि समाजमा सुनिन थालेको छ । अर्को कुरा पहिले आफ्नै साथीहरूसँग बोल्न पनि धक लाग्थ्यो । अहिले ममा त्यो समस्या छैन । मासलाई फेस गर्न सक्छु ।

तपाईंको लक्ष्य ?

म अहिले एमबीएको तयारीमा छु । अहिलेको प्राथमिकता अध्ययन नै हो । त्यसपछि बैंकिङ क्षेत्रमा लाग्छु । मेरो एकमात्र लक्ष्य सफल बैंकर बन्ने हो ।

सौन्दर्य प्रतियोगितामा भाग लिन चाहनेलाई के भन्नुहुन्छ ?

यस्तो प्रतियोगिता हामीजस्तो केही गर्न खोज्ने युवतीका लागि राम्रो प्लेटफर्म हो । छोटो समयमा धेरै कुरा सिक्न सकिने भएकाले यसका फाइदा धेरै छन् । त्यही भएर अहिले सौन्दर्य प्रतियोगिताको संख्या बढेको हो । जति प्रतियोगिता भए पनि प्रतियोगीको कमी छैन । तर, भाग लिनुअघि आयोजकको पृष्ठभूमि, प्रतियोगिताको स्तरबारे बुझ्न जरुरी छ ।

कतिपय त अझै पनि सौन्दर्य प्रतियोगितामा भाग लिन हिच्किचाउँछन नि ?

कतिपयले भाग लिन चाहेर पनि परिवारका कारण रोकिएका छन् । यस्तो अवस्थामा परिवारलाई विश्वास दिलाउन सक्नुपर्छ । केही नयाँ कुरा सिक्न सकिन्छ भने किन भाग नलिने ? नारी सशक्तीकरणका लागि पनि सौन्दर्य प्रतियोगिता एउटा आधार हो ।
प्रस्तुति : रामकला खड्का