हिमालसँग डराउँछिन् जाङमु
हिमालनजिकै जन्मिएकी जाङ्मु हिमालसँग डराउने गर्छिन् । मोडलिङ क्षेत्रमा आफूलाई स्थापित गराउन लागिपरेकी उनी संखुवासभाको मकालुमा जन्मिएकी हुन् । जाङ्मुले मोडलिङ सुरु गरेको दुई वर्षमा एक दर्जनभन्दा बढी म्युजिक भिडियोमा अभिनय गरिसकेकी छन् । कक्षा १२ सकाएर स्नातक अध्ययनको तयारीमा रहेकी उनले हिजोआज अभिनयको कक्षा पनि लिइरहेकी छन् ।
परिवार र आफन्तले हिमाल आरोहणको पेसा अपनाए पनि शेर्पा जातिबाट अभिनयमा लाग्दा उनीप्रति सबैले चासो देखाएका छन् । अभिनेत्री ऋचा शर्मासँग अभिनय कक्षा लिएपछि अभिनयमा अझ दख्खल र उत्साह बढेको उनको भनाइ छ । मेलिना राईको यो मुटु, उत्तमजंग लिम्बूको चञ्चल, साजन राईको जिन्दगीभर र शेर्पा गीत म घुम्न जाँदा जिरीको बजार, आँखाको रमझमलगायतमा उनले अभियन गरिसकेकी छन् ।
२० वर्षीया शेर्पाले १३ वर्षको उमेरमा ‘किड क्विन नेपाल’मा भाग लिएपछि मोडलिङमा मोह बढेको बताइन् । त्यसपछि मिस एसएलसी-२०१५ मा प्रतिस्पर्धीमध्ये टप फाइभको उपाधि चुमिन् । मिस ई-कलेजमा प्रतिस्पर्धा गरिसकेकी उनी मोडलिङमा सोख भएकाले दर्शकको मन जित्ने गरी व्यावसायिकतामा ध्यान दिने बताउँछिन् ।
मोडलिङ पेसा अँगाल्दा शेर्पा समाजले खासै सहयोग नगरे पनि समाजको पछिल्लो पुस्तामाझ यो पेसालाई सकारात्मक बनाउन लागिपर्ने जाङ्मुले बताइन् । ‘परिवारको सहयोगबाट म यो पेसामा अघि बढ्नेमा निर्धक्क छु’, उनले भनिन् ।
प्रतिक्रिया दिनुहोस !
