वर्षका यी सर्वोत्कृष्ट
मैदानको प्रतिस्पर्धा समाप्त भएपछि फुटबलरबीच फेरि एकपटक वर्षकोे सर्वोत्कृष्ट बन्नका लागि प्रतिस्पर्धा हुने गर्छ, जसको रोमाञ्चले विश्व फुटबल जगत्लाई नै तरंगित तुल्याउने गर्छ । फिफाका दुई सयभन्दा बढी सदस्यराष्ट्रका मुख्य प्रशिक्षक र कप्तान, छनोट गरिएका सीमित खेल पत्रकार अनि समर्थकहरू खेलाडी बन्ने मैदानबाहिरको यो प्रतिस्पर्धाले वर्षको सर्वोत्कृष्ट एक खेलाडीको टुंगो लगाउने गर्छ ।
यस रोमाञ्चक प्रतिस्पर्धामा यसपटक पनि स्पेनिस क्लब रियल म्याड्रिडका पोर्चुगिज फुटबलर क्रिस्टियानो रोनाल्डोले बाजी मारे । उनी यो वर्षको उत्कृष्ट मध्येको पनि उत्कृष्ट अर्थात् सर्वोत्कृष्ट पुरुष फुटबलर चुनिए । फिफाले बर्सेनि प्रदान गर्दै आइरहेको (सन् २०१० देखि २०१५ सम्म फिफा बेलोन्डेअरको रूपमा प्रदान गरिएको) यस अवार्डका लागि रोनाल्डोले स्पेनी क्लब बार्सिलोनाकै अर्जेन्टिनी स्ट्राइकर लियोनल मेसी र फ्रान्सेली क्लब पेरिस सेन्ट जर्मन (पीएसजी)का ब्राजिलियन स्ट्राइकर नेमारलाई पछि पारे ।
फिफाका सदस्यराष्ट्रहरूका मुख्य प्रशिक्षक, कप्तान, फुटबल पत्रकार र पहिलोपटक प्रयोग गरिएको अनलाइन भोटिङका आधारमा रोनाल्डो यस वर्षको उत्कृष्ट फुटबलर घोषित भए । रोनाल्डोले प्राप्त मतको ४३.१६ प्रतिशत मत पाएका थिए । मेसीले १९.२५ प्रतिशत मत प्राप्त गर्दा नेमारले ६.९७ प्रतिशत मत पाए । दुई कट्टर प्रतिस्पर्धीलाई निकै पछि पारेर यो अवार्ड जित्नुको आधार रोनाल्डोले सन् २०१६÷१७ को सिजनमा गरेको प्रदर्शन नै हो ।
रोनाल्डोले यो अवधिमा आफ्नो क्लब रियल म्याड्रिडलाई युरोपियन च्याम्पियन्स लिगसहित घरेलु लिग र स्पेनिस सुपर कपको उपाधि दिलाएका थिए । रियलले इटालियन क्लब युभेन्ट्सलाई ४-१ गोलले हराउँदै युरोपियन च्याम्पियन्स लिगको उपाधि जित्दा रोनाल्डोले नै महत्वपूर्ण योगदान पुर्याएका थिए । समूहगत चरणदेखि फाइनलसम्म उनको सशक्त प्रदर्शनमा रियल युरोपकै अब्बल टोली ठहरिएको थियो ।
फिफाका सदस्यराष्ट्रका मुख्य प्रशिक्षक, कप्तान, फुटबल पत्रकार र पहिलोपटक प्रयोग गरिएको अनलाइन भोटिङका आधारमा रोनाल्डो यस वर्षको उत्कृष्ट फुटबलर घोषित भए ।
रोनाल्डोले सर्वाधिक पाँचपटक वर्ष खेलाडीको अवार्ड जित्ने मेसीको कीर्तिमान बराबरी गरेका छन् । सन् २००८ मा पहिलोपटक वर्ष खेलाडीको अवार्ड पाएका रोनाल्डोले त्यसपछि सन् २०१३, सन् २०१४ र सन् २०१६ मा पनि यो सफलता हात पारेका थिए । यो अवार्ड सर्वाधिक पाँचपटक जित्ने फुटबलर रोनाल्डो र मेसीमात्रै हुन् ।
रोचक प्रसंग के भने यस वर्ष रोनाल्डो र मेसी दुवैले आफ्नो मत आफ्ना सहकर्मीलाई दिएका थिए । अर्जेन्टिनी टोलीको कप्तानका रूपमा मेसीले आफ्नो मत बार्सिलोनाका लुइस स्वारेजलाई दिएका थिए भने पोर्चुगलको कप्तानका रूपमा रोनाल्डोले पनि आफ्नो मत रियल म्याड्रिडकै लुका मोड्रिचलाई दिएका थिए ।
यो प्रतिस्पर्धामा नेपालको मत पनि रोनाल्डोलाई नै गएको छ । नेपाली राष्ट्रिय टोलीका प्रशिक्षक ग्योतोकु कोजीले आफ्नो मत रोनाल्डोलाई दिएका थिए । कोजीले रोनाल्डोलाई पहिलो, मेसीलाई दोस्रो र नेमारलाई तेस्रो रोजाइमा पारेका थिए ।
सन् २०१० देखि सन् २०१५ सम्म विश्व फुटबल महासंघ (फिफा) ले फ्रान्सेली फुटबल म्यागजिनसँग मिलेर ‘फिफा बालन डी ओर’को नाममा वर्षको सर्वोत्कृष्ट फुटबल खेलाडी अवार्ड प्रदान गर्ने गरेको थियो । सन् २०१६ देखि भने फिफा र ‘बालन डी ओर’ले छुट्टाछुट्टै अवार्ड प्रदान गर्दै आएका छन् । सन् २०१६ को ‘बालन डी ओर’ अवार्ड पनि रोनाल्डोले नै जितेका थिए ।
अन्य सर्वोत्कृष्टहरू
महिलातर्फको वर्षको सर्वोत्कृष्ट खेलाडीको अवार्ड नेदरल्यान्ड्सकी लाइकी मार्टन्सले जितिन् । बार्सिलोनाबाट व्यावसायिक फुटबल खेल्ने मार्टन्सले अन्तिम तीनमा परेका अमेरिकाकी कार्ली लोयड र भेनेजुएलाकी डेयना कास्टेल्लानसलाई पछि पार्दै अवार्ड हात पारेकी हुन् । मार्टन्सले २१.७२ प्रतिशत मत प्राप्त गर्दा लोयडले १६.२८ र कास्टेल्लानसले ११.६९ प्रतिशत मत पाएका थिए ।
मार्टन्सले सन् २०१७ को अगस्टमा नेदरल्यान्ड्सलाई महिला युरोपियन च्याम्पियनसिपको उपाधि दिलाउन महत्वपूर्ण भूमिका निर्वाह गरेकी थिइन् । नेदरल्यान्ड्सले फाइनलमा डेनमार्कलाई ४-२ गोलले हराउँदा २४ वर्षीया विंगर मार्टन्सले पनि एक गोल गरेकी थिइन् ।
रियल म्याड्रिडका जिनेदिन जिदान सर्वोत्कृष्ट पुरुष प्रशिक्षक घोषित भए । फ्रान्सका जिदान रियल म्याड्रिडकै पूर्वखेलाडी हुन् । सर्वोत्कृष्ट प्रशिक्षकको पहिलो स्थानमा रहेका जिदानले चेल्सीका एन्टोनियो कोन्टे र युभेन्टसका मासिमिलियानो एलेग्रिलाई पछि पारे । जिदानले ४६.२२ प्रतिशत मत पाउँदा कोन्टेले ११.६२ र एलेग्रीले ८.७८ प्रतिशत मत प्राप्त गरेका थिए । वर्षको सर्वोत्कृष्ट महिला प्रशिक्षकको अवार्ड भने नेदरल्यान्ड्सकी सरिना बिगम्यानले जितिन् । बिगम्यानले ३६.२४, निल्स निल्सनले १२.६४ र जेरार्ड प्रेचरले ९.३७ प्रतिशत मत पाएका थिए ।
भेट्रान्स गोलरक्षक जियानलुइगी बुफोन सर्वोत्कृष्ट गोलरक्षक घोषित भए । सिरिए क्लब युभेन्ट्सबाट व्यावसायिक फुटबल खेल्ने इटालियन खेलाडी बुफोनले गत वर्ष लिग च्याम्पियन बन्दा गरेको प्रदर्शनका आधारमा सर्वोत्कृष्ट गोलरक्षक बनेका हुन् । गत सिजनमा युभेन्ट्सले लगातार छैटौंपटक सिरिएको उपाधि जित्दा ३९ वर्षीय गोलरक्षक बुफोनले पोस्टमा उत्कृष्ट प्रदर्शन गरेका थिए ।
वर्षभरि भएकामध्ये सर्वोत्कृष्ट गोल गर्ने खेलाडीले पाउने पुस्कास अवार्ड इङ्लिस प्रिमियर लिग क्लब आर्सनलका प्रभावशाली खेलाडी ओलिभर गिरोडले पाए । गिरोडले सन् २०१७ को जनवरीमा खेलिएको क्रिस्टल प्यालेसविरुद्घको खेलमा गरेको ‘स्कोर्पियन किक’ गोल यो अवधिको सर्वोत्कृष्ट ठहरियो । आर्सनल २-० गोलले विजयी भएको खेलमा गरेको उनको गोलले ३६.१ प्रतिशत मत पायो ।
फिफाले सोही अवसरमा टोगोका खेलाडी फ्रान्सिस कोनलाई ‘फेयर प्ले अवार्ड’ बाट सम्मान गरेको छ । चेक गणतन्त्रको घरेलु लिगका क्रममा मैदानमा लडेका विपक्षी टोलीका गोलरक्षकको जीवन बचाएका उनलाई फेयर प्ले अवार्ड प्रदान गरिएको हो । यसैगरी स्कटल्यान्डको क्लब सेल्टिक आफ्नो समर्थकको आदर्श व्यवहारका कारण सम्मानित भएको छ । फिफाले सेल्टिकका समर्थकलाई यो अवधिकै सर्वोत्कृष्ट समर्थक मानेको छ ।
फिफा विश्व ११
यसैगरी सन् २०१६÷१७ सिजनमा खेलाडीले गरेको प्रदर्शनका आधारमा फिफाद्वारा घोषित उत्कृष्ट टोलीमा भने जियानलुइगी बुफोन, डानी आल्भेस, लियोनार्दो बोनुच्ची, सर्जियो रामोस, मार्सेलो, लुका मोड्रिच, टोनी क्रुज, आन्द्रे इनिएस्टा, लियोनल मेसी, क्रिस्टियानो रोनाल्डो र नेमार परेका छन् । उत्कृष्ट फिफा-११ टोलीमा रियल म्याड्रिडका पाँच, बार्सिलोना र पीएसजीका दुई÷दुई तथा युभेन्ट्स र एसी मिलानका एक÷एक खेलाडी परेका छन् । यसपटक इङ्लिस प्रिमियर लिग क्लबबाट भने फिफा-११ टोलीमा एकजना खेलाडी पनि परेनन् ।
प्रतिक्रिया दिनुहोस !
