एकै क्षेत्र रोज्दा सकस
सिन्धुली : दोस्रो चरणको प्रतिनिधिसभा र प्रदेशसभा निर्वाचनका लागि एमाले र माओवादी केन्द्रबीच सहमति हुन नसक्दा उम्मेदवार छनोट अन्योलमा परेको छ । एकै क्षेत्र दुवै पार्टीका जिल्ला स्तरका प्रभावशाली नेताको रोजाइमा परेपछि उम्मेदवारको टुंगो लाग्न नसकेको हो । प्रदेशसभातर्फ क्षेत्र नम्बर २ (१) मा माओवादी केन्द्रले दाबी गरेपछि एमालेलाई समस्या भएको छ । दुवै दलका नेता सम्मिलित कार्यदलले एक सातायता विवाद टुंग्याउन नसक्दा जिल्लाका अन्य प्रदेशसभा र प्रतिनिधिसभा सदस्य उम्मेदवारसमेत टुंगो लाग्न सकेको छैन ।
यो क्षेत्रबाट एमालेका पूर्वकेन्द्रीय सल्लाहकार केशव देवकोटा र माओवादी केन्द्रका जिल्ला अध्यक्ष राजन दाहालको सिफारिस भएकाले समस्या आएको एमाले जिल्ला अध्यक्ष प्रदीप कटवालले बताए । ‘क्षेत्र नम्बर २ (१) मा हाम्रो पार्टीको जनाधार धेरै छ । यहाँ गठबन्धनबाट जो उम्मेदवार भए पनि जित सुनिश्चित छ । त्यसैले हाम्रो भागमा पर्नुपर्छ भन्ने हो', उनले भने, ‘माओवादीको पनि जनाधार राम्रो भएको प्रदेश भन्दै दाबी परिरहेको छ । कार्यदलमा लामो छलफल गर्दा पनि टुंगिन सकेको छैन ।'
स्थानीय तह निर्वाचनमा कमलामाई नगरपालिका एमाले र सुनकोसी गाउँपालिका माओवादी केन्द्रले जितेका थिए । प्रदेशसभा र प्रतिनिधिसभा निर्वाचनका लागि कमलामाई र सुनकोसीलाई मिलाएर क्षेत्र नम्बर २ (१) तय भएको छ ।
प्रतिनिधिसभातर्फ दुई र प्रदेशसभातर्फ चार निर्वाचन क्षेत्र रहेको सिन्धुलीमा वाम गठबन्धनबीच केन्द्रका लागि १÷१ सिट लिने निश्चित छ । तर, देवकोटा र दाहालको उम्मेदवारीको टुंगो नलाग्दा प्रदेशसभातर्फ तीन क्षेत्रको उम्मेदवारको टुंगो लगाउन नसकेको माओवादी केन्द्रका ज्वालाप्रसाद न्यौपानेको भनाइ छ ।
‘जिल्लाका प्रदेशसभा सदस्य उम्मेदवारको विषयमा केन्द्रबाट पनि कुनै निर्णय नआएको र स्थानीय स्तरमा गठित कार्यदलले पनि निचोड निकाल्न नसक्दा समस्या भएको छ', नेता न्यौपानेले भने ।
दुई प्रतिनिधिसभाका दुई/दुईवटै प्रदेशसभा भागबन्डा गर्ने सहमति भए पनि कुन-कुन ककसले लिने भन्नेमा विवाद भएको गठबन्धनले जनाएको छ । उम्मेदवारको मनोनयनपत्र दर्ता गर्ने मिति नजिकिँदै गए पनि सहमति जुट्न नसक्दा कार्यकर्तामा निराशा छाएको छ ।