आज नेपाल र किर्गिस्तान भिड्ने
काठमाडौं : एएफसी यू-१९ छनोट च्याम्पियनसिपको पहिलो खेलमा नेपालले मंगलबार घरेलु टोली किर्गिस्तानसँग प्रतिस्पर्धा गर्नेछ । नेपाली टोलीको मनोबल उच्च रहेकोले घरेलु टोलीसँग उत्कृष्ट खेल्ने दाबी टोलीका प्रशिक्षक छिरिङ लोप्साङले आइतबार किर्गिस्तान प्रस्थान गर्नुअघि नै बताएका थिए । उमेरसमूहमा उत्कृष्ट नतिजा निकालिरहेको नेपाली टोलीले एक महिनाअघि मात्र भुटानमा भएको यू-१८ साफ च्याम्पियनसिपको उपाधि जितेको थियो ।
छनोट च्याम्पियनसिपको समूह ‘ए’ मा नेपालसहित आयोजक किर्गिस्तान, बहराइन, यूएई र ओमन छन् । समूहको दोस्रो खेल नेपालले नोभेम्बर २ तारिखमा बहराइनसँग, तेस्रो खेल नोभेम्बर ४ तारिखमा यूएईसँग र अन्तिम खेल नोभेम्बर ८ तारिखमा ओमनसँग खेल्नेछ ।
छनोट च्याम्पियनसिपमा सहभागी एसियाली राष्ट्रलाई १० समूहमा विभाजन गरिएको छ । प्रत्येक समूहका विजेता र उत्कृष्ट उपविजेताले सन् २०१८ मा आयोजना हुने एएफसी यू-१९ च्याम्पियनसिप खेल्न पाउने छन् ।
प्रतिक्रिया दिनुहोस !
