खेलाडी उत्पादन गर्ने एन्फा एकेडेमी बाख्राको खोर बन्यो

धरान : पाँच वर्षदेखि बन्द रहेको धरानस्थित एन्फा टेक्निकल सेन्टर बाख्राको खोरमा परिणत भएको छ । अखिल नेपाल फुटबल संघ (एन्फा) को बेवास्ताका कारण जीर्ण बनेको धरान—१७ स्थित एन्फा टेक्निकल सेन्टर बाख्राको खोर र लागूऔषध सेवनकर्ताको अखडाका रूपमा परिणत भएको हो । २०६६ सालमा फुटबल खेलाडी उत्पादन गर्ने उद्देश्यले स्थापना गरिएको एन्फा टेक्निकल सेन्टर २०६९ सालदेखि बन्द छ ।

तत्कालीन एन्फा अध्यक्ष गणेश थापा विरुद्ध उपाध्यक्ष किशोर राई र कर्माछिरिङ शेर्पा समूहले सुरु गरेको आन्दोलनसँगै टेक्निकल सेन्टर बन्द भएको थियो । टेक्निकल सेन्टर बन्द भएको पाँच वर्ष बितिसक्दा समेत पुनः सञ्चालन नहुँदा करोडौं रुपैयाँ लगानीमा निर्माण गरिएको दुई हजार पाँच सय दर्शक अटाउने प्यारापिट र खेलाडी आवाससहितको भवन पनि जीर्ण बन्दै गएको छ ।

पाँच वर्षदेखि बन्द भएको टेक्निकल सेन्टरको रेखदेख राम्रोसंँग नहुँदा प्यारापिटबाट पानी चुहिएर आवास भवनका सबै कोठाहरू जीर्ण बनेका छन् । खेलाडी बस्ने भवनको झ्याल÷ढोका मक्किएर काम नलाग्ने भएका छन् । टेक्निकल सेन्टरको आवास भवन अहिले बाख्रा र राँगा पाल्ने गोठमा परिणत भएको छ । टेक्निकल सेन्टर परिसर दुर्गन्धित भएको स्थानीय बासिन्दाले गुनासो गरेका छन् । टेक्निकल सेन्टरको मर्मतका लागि एन्फा केन्द्रीय समितिले कुनै पनि चासो देखाएको छैन ।

एन्फाका तत्कालीन अध्यक्ष थापाको धरान निवासी एन्फाका उपाध्यक्ष राई समूहले विरोध गर्न थालेपछि थापाले एन्फा टेक्निकल सेन्टर धरानको रकम निकासा बन्द गराएका कारण सेन्टर बन्द भएको थियो । बन्द भएको पाँच वर्षसम्म पनि एन्फाले टेक्निकल सेन्टर सञ्चालन गर्न नसकेपछि प्यारापिट, आवास भवन र खेलमैदान जीर्ण बनेको धरान फुटबल क्लबका महासचिव प्रताप तामाङले बताए । उनले एन्फाले टेक्निकल सेन्टर बन्द गरेका कारण धरानमा फुटबल खेलाडी उत्पादन गर्न प्रशिक्षण दिने शिक्षकको अभाव भएको गुनेसो पनि गरे ।

स्थानीय जीवन भट्टराईले एन्फाको बेवास्ताका कारण करोडौंको भौतिक संरचना जीर्ण बन्नुका साथै फुटबल खेलाडी उत्पादनमा समेत समस्या परेको बताए । अहिले टेक्निकल सेन्टरमा चौकीदार अर्जुन गिरीले बाख्रा पालेका छन् । बाख्राका कारण खेलाडी भवन दुर्गन्धित बनेको छ । तर, चौकीदार गिरी भने एन्फाले चार वर्षदेखि आफूहरूको तलब नदिएको गुनासो गर्छन् । ‘एन्फाले चार वर्षसम्म तलबभत्ता नदिएपछि टेक्निकल सेन्टरमा बाख्रा पालेर जीवन गुजारा गरिरहेको छु । एन्फाले चार वर्षको एकमुष्ट रकम दिए केही सहज हुन्थ्यो,’ गिरीले भन्छन् ।

अखिल नेपाल फुटबल संघका केन्द्रीय उपाध्यक्ष किशोर राईले एन्फाका अध्यक्ष नरेन्द्र श्रेष्ठको बेवास्ता र लापरबाहीका कारण धरानको एन्फा टेक्निकल सेन्टर सञ्चालनमा आउन नसकेको आरोप लगाए । पटकपटक टेक्निकल सेन्टर सञ्चालन गर्न माग गर्दा पनि एन्फा अध्यक्ष श्रेष्ठले अटेर गरेका कारण आफूहरूले उनीविरुद्ध कडा आन्दोलन गर्ने चेतावनी दिएको पनि उनले बताए । ‘हिजो गणेश थापाले पनि नेपाली फुटबललाई धराशायी बनाएका थिए । आज थापाकै लहैलहैमा लागेर श्रेष्ठले पनि नेपाली फुटबल धराशायी बनाउन खोज्दैछन्’, उपाध्यक्ष राईले भने ।
तर एन्फाका अध्यक्ष श्रेष्ठ भने आफूमाथि उपाध्यक्षले लगाएको आरोप निराधार भएको बताउँछन् ।

‘पदीय हिसाबमा एन्फाको अध्यक्षको जिम्मेवारी मेरो हो तर, धरान टेक्निकल सेन्टर चार वर्षअघि जिल्ला फुटबल संघको मनोमानीका कारण लथालिंग बनेको हो । खेलाडी भर्नाका विषयमा जिल्लाका पदाधिकारीले विवाद गरे । भएको मैदानलाई स्थानीय पदाधिकारी र सरोकारवालाले पनि स्याहारसम्हार गर्नुपर्ने हो । आफूहरू टेक्निकल सेन्टरमा बाख्रा र राँगा पालेको हेर्दै बस्ने अनि दोष जति अरूलाई लगाएर समस्याको समाधान हुँदैन’, श्रेष्ठले भने ।

श्रेष्ठले धरान टेक्निकल सेन्टर फिफा गोल प्रोजेक्टअन्तर्गत निर्माण भएको हुनाले एन्फाले आगामी सिजनमा टेक्निकल सेन्टरको मर्मतसम्हार गरी खेलाडी राख्ने योजना बनाएको पनि बताए । ‘हालै एएफसी अध्यक्षको नेपाल भ्रमणका क्रममा धरानस्थित टेक्निकल सेन्टरको विषयमा पनि कुरा भएको थियो । टेक्निकल सेन्टर मर्मतका लागि एन्फाले २० लाख रुपैयाँको प्रस्ताव एएफसीमा पठाएको छ । हामी टेक्निकल सेन्टरको मर्मतमात्र होइन, त्यहाँ एकेडेमी नै सञ्चालन गर्न लागिपरेका छौं,’ श्रेष्ठले भने ।