टोकियो : जापानको प्रधानमन्त्रीमा यहाँको लिबरल डेमोक्रेटिक पार्टीका नेता सिन्जो आबे पुनः निर्वाचित भएका छन् । वर्तमान कामचलाउ सरकारका प्रधानमन्त्रीसमेत रहेका उनी जापानको प्रधानमन्त्रीमा बुधबार पुनः निर्वाचित भएको प्राप्त समाचारमा जनाइएको छ ।
जापानको दुवै सदनले उनलाई प्रधानमन्त्रीमा निर्वाचित गरेको हो । उनले घोषणा गरेको आमनिर्वाचन हालै सम्पन्न भएको थियो । निर्वाचनमा उनको दल लिबरल डेमोक्रेटिक पार्टीले दुईतिहाइ बहुमत हासिल गरेको थियो । संसदीय निर्वाचनमा उनको दलले जापानी संसद्को तल्लो सदनमा दुईतिहाइ बहुमत हासिल गरेको हो । उनलाई सोही संसद्ले बुधबार प्रधानमन्त्रीमा निर्वाचित गरेको हो ।
जापानको उक्त निर्वाचनमा उनको विगतदेखिकै सत्तारुढ अर्काे दल कोमेइतो पार्टी पनि गठबन्धनमा सामेल भएको थियो । अबको नयाँ सरकारमा पनि सो दल सहभागी हुने भएको छ । बुधबार बसेको जापानी संसद्को विशेष बैठकले उनलाई प्रधानमन्त्रीमा नियुक्त गरे पनि औपचारिक रूपमा उनको नाम घोषणा हुन भने बाँकी छ । उनले बुधबारै साँझ घोषणा गर्ने मन्त्रिमण्डललाई जापानी राजदरबारमा शपथ गराउने कार्यक्रम छ । (रासस÷सिन्ह्वा)
प्रतिक्रिया दिनुहोस !
